Abşeron rayonunda məcburi köçkün ailələri üçün salınmış yaşayış kompleksinin istifadəyə verilməsi mərasimi baş tutub. Mərasimdə Azərbaycan Respublikasının Prezidenti İlham Əliyev iştirak edib. Cənab Prezident tədbirdə çıxışı zamanı qeyd edib ki, məcburi köçkünlərin problemləri sosial məsələlər arasında ön plandadır və son illərdə məcburi köçkünlərin problemlərinin həlli işində çox böyük addımlar atılıb.
Ölkə başçısının fikirlərində çox böyük həqiqət payının olduğunu söyləyən millət vəkili Rauf Əliyev "Sherg.az”a bildirib ki, cənab Prezidentin şəhid ailələri, Qarabağ müharibəsi əlilləri, qaçqın və məcburi köçkünlərlə bağlı atdığı addımlarına münasibəti çox müsbətdir:
"1990-cı illərdə bizim 1milyon qaçqınımız olanda bu statistikaya görə dünyada birinci idik. Hazırda dünyada baş verən proseslər qloballaşıb, imiqrantlar olub. Avropaya 1 milyon immiqrant gələndə buna dözmədilər.
Amma indi Azərbaycanda 1 milyondan çox qardaş, bacımız qaçqın kimi yaşayır. Həqiqətən də onlara cənab Prezidentin qayğısı yüksək səviyyədədir. İlham Əliyev Prezident seçiləndə xalqa söz verdi ki, Azərbaycanda bir dənə də palatka şəhərciyi qalmayacaq.
Doğrundan da cənab Prezident sözünün üstündə durdu. Hazırda bu istiqamətdə yeni-yeni şəhərciklər tikilib. Son olaraq Abşeronda inşa olunan şəhərcik buna nümunədir. Ümumiyyətlə, dövlət tərəfindən qaçqınlara yalnız mən zil verilməyib. Onlara bağça, məktəb, idman meydaçası və müəyyən sosial məsələlər, məişət problemi kimi sahələrdə qayğı göstərilib. Düzdür, müəyyən problemlər hələ də qalır. Amma bunlar yaxın gələcəkdə tamam aradan qaldırılacaq. Çünki bu sahədə mərhələli şəkildə işlər gedir.
Cənab Prezidentin qaçqın və məcburi köçkünlərə diqqəti yüksək səviyyədədir. Hazırda dövlətin diqqəti yalnız bu yöndə deyil. Əsas istəyimiz Azərbaycanın hər yerində insanların, xalqın rahat yaşamasıdır. Bunun üçün hökumət tərəfindən bir sıra addımlar atılıb Müxtəlif layihələr həyata keçirilib. Bu gün Azərbaycanın ən ucqar kəndində belə insanların bütün ehtiyacları qarşılanır.
Onlar işıq, su, qaz sistemi ilə təmin edilib. Ölkənin bütün regionları inkişaf edir. Bu istiqamətdə işlər siyasi məsələlərdə də aparılır. Gündən-günə Azərbaycanın dünya ölkələri içərisində nüfuzu artır. Bir sıra beynəlxalq layihələrə qoşuluruq. Bu gün hansı postsovet ölkəsi Avropanın layihələrində iştirak edir ? Amma cənab Prezident bunların hamısına nail olub".
Deputatın fikrincə, ölkə başçısının qaçqınlara diqqəti hər kəsə nümumə olmalıdır:
"Bütün insanlar onlara yardım etməlidir. Hazırda həm cənab Prezidentin, həm də Birinci vitse -prezident Mehriban xanım Əliyevanın xalqa qayğısı, yardımı hər ötən gün genişlənir. Hər kəs razılıq ifadə edir. Bu addımlarına görə, həm ölkə başçısına, həm də Birinci vitse -prezidentə minnətdarlığımı bildirirəm. Bizim ən ali məqsədimiz Qarabağın geri qaytarılması, bayrağımızın orada ucaldılması və bütün qaçqınların öz evlərinə qayıtmasıdır. İnanıram ki, o günlər uzaqda deyil ”.
Kənan Eynuroğlu
