Gürcüstan Prezidenti Giorgi Marqvelaşvilinin fərmanı ilə 116 nəfər məhbus əfv olunub. Əfv olunanlardan biri də Azərbaycan Respublikasının vətəndaşıdır.
Gürcüstanın Əfv məsələləri üzrə Dövlət Komissiyasının sədri Zviad Koridze açıqlamasında bildirib ki, fevralın 19-dan 26-dək olan müddətdə ümumilikdə 858 məhbusun müraciətinə baxılıb. 43 nəfərin cəzalarının çəkilməmiş hissəsi xeyli azaldılıb.
Onların sırasında qadınlar da var. Komissiyada baxılan müraciətlər arasında Azərbaycan vətəndaşlarının da sənədləri olub. Ancaq hesab edilir ki, həbsdən azad edilən soydaşlarımız daha çox ola bilərdi. Çünki həbsxanada yatan azərbaycanlılar arasında "siyasi məhbus” və ya qatı cinayət törətmiş şəxslər demək olar ki, yoxdur.
Məsələni "Şərq”ə dəyərləndirən Gürcüstanda yaşayan soydaşımız, "Qeyrət” Xalq Hərəkatının rəhbəri Əlibala Əsgərov da Komissiyanın tərtib etdiyi siyahıdan narazı olanlar arasındadır:
"Həbsxanada olan azərbaycanlılar arasında siyasi məhbus yoxdur. Məncə, əfv olunanlar arasında daha çox azərbaycanlı ola bilərdi. Lakin problem ondadır ki, bizimkilər Əfv Komissiyasına çox az müraciət edirlər. Çünki informasiya boşluğu var, əhali prosedurlardan xəbərsizdir. Azərbaycanlıların əfvə düşməsini istəyiriksə, müraciətləri çoxaltmalıyıq. Təəssüflər olsun ki, çoxları Prezidentin əfv fərmanından məlumatsızdır. Fikrimcə, azərbaycanlıların bilərəkdən bu siyahıya salınmaması da mümkündür. Bu faktı da istisna etmirəm”.
İsmayıl
