Milli Məclisin ötən iclasında spiker Oqtay Əsədov yenə də deputatların intizamsızlığına irad tutub.
İclası pozduqlarına görə, Milli Məclisin sədri Oqtay Əsədov Madər Musayev, Rüfət Quliyev və İmamverdi İsmayılova xəbərdarlıq edərək deyib ki, "kim iclas keçirmək istəyirsə, gəlib otursun mənim yerimdə”.
Məsələ ilə bağlı "Şərq”ə danışan millət vəkili Çingiz Qənizadə isə birmənalı olaraq spikerin iradlarının haqlı olduğunu deyib:
"Yuxarıdan hər şey görünür. Milli Məclisin nizam-intizam qaydalarına əməl etməyən millət vəkillərinə parlament sədrinin öz iradını bildirməsi və onlara xəbərdarlıq edərək, müəyyən göstərişlər verməsi təbiidir. Sözün açığı, ötən iclasda o qədər də ciddi polemika yaşanmadı. Media nümayəndələri hadisəni bir az şişirdərək təqdim edib. Oqtay müəllim sadəcə olaraq gündəlikdəki məsələlərin həddindən çox və bütün işlərin ayın 6-na qədər yekunlaşdırılmalı olduğunu millət vəkillərinin diqqətinə çatdırıb.
Düzdür, zaman-zaman parlamentdə müəyyən mübahisələr də düşür. Bu da təbii bir şeydir. Parlamentdə hər kəsin danışmaq hüququ var. Amma nizam-intizam və digər mühüm məsələlərin təşkili spikerə həvalə olunduğundan istədiyi millət vəkilinin davranışına irad bildirə bilər”.
"Deputatların etik davranış qaydaları haqqında” qanun layihəsinin qəbul olunduğunu və prezident tərəfindən imzalandıqdan sonra icra olunacağını xatırladan Ç.Qənizadə deyib ki, qanunun icrasından sonra deputatlar özlərinin hüquq və məsuliyyətlərini daha çox dərk edəcəklər. Həm iclas zamanı, həm də iclasdan kənarda xoşagəlməz davranışlara yol verməyəcəklər.
Şəymən
