Türk ordusu "Fərat qalxanı” əməliyyatı çərçivəsində Suriyada İŞİD-in nəzarətində olan Əl-Bab şəhərinə girib. Şiddətli atışmalar nəticəsində strateji təpələr türk əsgərlərinin nəzarətinə keçib. Hücumda türk ordusu da itki verib.
2 türk hərbçisi həlak olub, 15-i isə yüngül xəsarət alıb. Türkiyə Silahlı Qüvvələrinin Baş Qərargahından bildirilib ki, iki gün ərzində "Fərat qalxanı” əməliyyatları çərçivəsində İŞİD-in 254 hədəfi məhv edilib, 58 terrorçusu zərərsizləşdirilib.
Türkiyə silahlı güclərinin Suriyadakı əməliyyatları ilə bağlı "Şərq”ə danışan politoloq Araz Aslanlı deyib ki, türk ordusu bölgədəki terrorçularla sərt mübarizə aparmağa məcburdur:
"Qardaş ölkədə yaşanan son terror aktları bir daha göstərdi ki, radikal qruplaşmalar Türkiyə üçün çox ciddi təhdiddir. Bu təhdid Suriyadakı türk silahlı qüvvələrinin daha kəskin addım atmasını şərtləndirirdi. Yəni Türkiyənin İŞİD-lə mübarizəsi həm daxili təhlükəsizlik, həm də ümumilikdə bölgənin stabilliyi baxımından olduqca zəruridir. Rəsmi Ankara çox çalışdı ki, terrorçularla mübarizə apardıqlarını iddia edən koalisiya qüvvələrini fəal surətdə prosesə cəlb etsin. Amma təəssüflər olsun ki, alınmadı. Türkiyə hökuməti də Rusiya ilə müəyyən mənada anlaşaraq Suriyada əməliyyatlara başladı”.
Ekspertin fikrincə, sadəcə türk əsgərlərinin mübarizəsi ilə bütövlükdə İŞİD-i məhv etmək mümkünsüzdür:
"Terrorçular təkcə Suriya və İraq ərazisi ilə məhdudlaşmır. Onların bazaları çoxdur və fəaliyyət sahələri geniş bölgələri əhatə edir. Suriya və İraqda terror qruplaşması nəzarət altına alınsa belə, tamamilə kökünü kəsmək çətindir. Türkiyə ordusunun əməliyyatları İŞİD-in zəiflədilməsinə, terrorçuların ciddi zərbə almasına xidmət edir. Eyni zamanda bu əməliyyatlar beynəlxalq təhlükəsizliyə də öz töhfəsini verir”.
İsmayıl
