"Bakı-Tiflis-Qars dəmir yolunun açılması ciddi qələbədir. Bir çoxları buna mane olmaq istəyirdi. Erməni lobbisinin ciddi təzyiqlərinə baxmayaraq, Azərbaycan dövlət başçısının siyasi iradəsi ilə dəmir yolu açıldı. Bu layihənin iqtisadi üstünlüklərini bir kənara qoyaraq deyirəm ki, ciddi siyasi əhəmiyyəti var. Bu, Azərbaycan müstəqilliyinin möhkəmlənməsinə xidmət edən layihədir”.
Sherg.az-ın xəbərinə görə bu sözləri Milli Məclisin bugünkü iclasında, BTQ-in işə düşməsindən danışarkən iqtisadçı millət vəkili Vahid Əhmədov deyib. O, layihənin həyata keçirilməsində əməyi olan hər kəsə minnətdarlığını bildirib: "Ən əsas da, Azərbaycan dövlət başçısına təşəkkürümü bildiriəm”. Deputat daha sonra qeyd edib ki, Əsrin Müqaviləsi imzalandıqdan sonra Azərbaycanda ciddi infrastruktur yaradılıb: "İndi müzakirə edilən saziş Əsrin Müqaviləsinin davamıdır. Çox müsbət haldır ki, yeni sazişə əsasən, layihədə işləyəcək şəxslərin 90 faizi Azərbaycan vətəndaşı olacaq”.
Anar
