"Xəzər dənizinin hüquqi statusu haqqında konvensiyanın imzalanması Azərbaycan və digər bölgə ölkələri üçün çox əhəmiyyətlidir. İlk növbədə ona görə ki, region ölkələri arasında Xəzər dənizinin dibinin, su səthinin bölünməsi, həmçinin naviqasiya, logistika imkanları, müdafiə və təhlükəsizlik baxımından mümkün münaqişələr və fikir ayırıqlarına son qoyan sənəd imzlandı".
Bu barədə "Sherg.az"a politoloq -hüquqşünas Zaur İbrahimli bildirib.
O qeyd edib ki, bu sənəd regional təhlükəsizlik arxitekturasının möhkəmlənməsinə çox böyük töhfədir:
"Başqa vacib məqam, 5 ölkənin konsensusla qəbul olunan hüquqi sənədin imzalanması Xəzərdə əməkdaşlığının daha da inkişaf etməsinə yeni imkanlar açmasıdır. Azərbaycan üçün də Xəzərin dibinin bölünməsi, təbii sərvətlərdən istifadə, ekologiya və logistika və naviqasiya, təhlükəsizlik məsələlərində yeni imkanlar yaranır. Azərbaycan artıq çoxdan bəri ikitərəfli müqavilələr imzalamaqla özü üçün müəyyən hüquqi baza yaratmışdı. Həmçinin Bakı hər dəfə Xəzərdə regiondan kənar hərbi qüvvələrin yerləşdirilməsi əleyhinə olduğunu bəyan etməklə bölgənin aparıcı ölkələrinin narahatlıqlarını anladığını bildirmişdi. Faktiki olaraq, Azərbaycan ikitərəfli müqavilələr və razılaşmalarla artıq qəbul olunan konvensiya üzrə konsensus əldə olunması üçün çox iş görmüşdü. Konvensiya ilə bağlı qeyd edim ki, çox uzun müzakirələrdən sonar konsensus əldə olundu. Konsensus bütün tərəflərin müəyyən güzəştlərə getməsini nəzərdə tutur.
Əks halda bu sənəd imzlanmazdı. Amma ən başlıcası budur ki, Azərbaycanın əsas maraqları nəzərə alınıb. Bu da Xəzərin dibinin milli sketorlara bölünməsidir. Bakı üçün bu çox əhəmiyyətlidir və faktiki olaraq, ölkəmiz üçün əhəmiyyət kəsb edən neft və qaz yataqları olan sektorlara sahiblik suveren hüquq kimi tanınıb. Azərbaycan bundan sonra neft-qaz sektoruna daha əlverişli şərtlərlə investorlar cəlb edəcək. Çünki bundan əvvəl müəyyən risklərin olması bəhanə gətirilə bilərdisə, indi bu, mümkün olmayacaq".
Şəymən
.
