"Yaşlı insanlar evə kirayəşinlər aldıqda yad insanlar olduğunu, onların etibarından sui-istifadə edə biləcəyini nəzərə almalıdırlar”.
Bunu Sherg.az-a Qusarda 89 yaşlı qadının evində yaşayan kirayəşin tərəfindən təqaüd kartından pulunun çıxarılıb, oğurlanmasına münasibət bildirərkən vəkil İradə Cavadova deyib.
O bildirib ki, təqaüd kartlarının kodu məxfi saxlanmalı, yaşlı insanlar da buna diqqət etməlidir:
"Yaşlı insanlar təqaüdlərini özləri ala bilmədikləri üçün qonşuya, qohumlara bu missiyanı həvalə edirlər. Nəticədə həmin gizli kodu da etibar etməli olurlar. Onlar etibardan sui-istifadə edib, yaşlı insanları aldada bilirlər. Təbii ki, həmin şəxslər polisə müraciət etməli, pulun qaytarılmasına dair köməklik göstərilməsini istəməlidirlər. Hüquq-mühafizə orqanları bunu araşdırıb, üzə çıxarır”.
Yaşlıların etibarından sui-istifadə edən şəxslərin alacağı cəzalara gəlincə, vəkil deyib ki, həmin şəxslər həm cərimə, həm də həbs cəzası ala bilərlər:
"2000 manatdan çox pulun oğurlanması ciddi məsələdir. Cinayət məcəlləsinin 178-ci maddəsinə (dələduzluq, etibardan sui-istifadə etmə və ya aldatma yolu ilə zərərçəkmişin əmlakını ələ keçirmə) uyğun olaraq pulu oğurlayan şəxs cərimə və ya ictimai işlər, azadlıqdan məhrum etmə ilə cəzalandırıla bilər. Az miqdarda pulun mənimsənilməsinə görə, 700 manat civarında, xeyli miqdarda pula görə isə 5000 manatadək cərimə və 3 ildən 5 ilədək azadlıqdan məhrum etmə ilə cəzalandırma tətbiq edilə bilər.
Təbii ki, yaşlılar mütləq şikayət etməlidir. Bəzən olur ki, yaşlı insanların gedib-gələ bilməməsinə görə hüquq-mühafizə orqanlarında iş bağlanır, yaxud maraqlanmırlar. O zaman müxtəlif QHT-lərə, 102 qaynar xəttinə və Daxili İşlər Nazirliyinə elektron məlumat göndərsinlər. Bu zaman onlar problemlərinin həllinə nail ola bilərlər”.
Qeyd edək ki, iyunun 30-da Qusar şəhər sakini olan 89 yaşlı Zərxanım Nurullayevanın qızı anasının banklardan birinə məxsus hesabından pulunun çıxarılaraq oğurlanması barədə Rayon Polis Şöbəsinə ərizə ilə müraciət edib. Araşdırma nəticəsində məlum olub ki, oğurluğu qadının evində kirayəşin olan Sələh-oba kənd sakini Ruslan Hacımətov olması aşkarlanıb.
Aysel Aslan
