Azərbaycanın bank sistemi dərindən monitorinq olunmalıdır. Bu barədə Beynəlxalq Valyuta Fondunun (BVF) Azərbaycan üzrə açıqladığı proqnozda deyilir. Fondun rəhbərliyi hesab edir ki, qeyri-səmərəli bankların bağlanması müsbət haldır və maliyyə sektorunun dayanıqlılığına dəstək olmaq üçün atılan addımlar davam etdirilməlidir.
BVF rəsmiləri tənzimləyiciləri böyük bankın özəlləşdirilməsi məqsədilə restrukturizasiya prosesini davam etdirməyə, bank sisteminin digər iştirakçılarının da problemlərini həll etməyə çağırıb.
BVF-nin çağırışını dəyərləndirən Oqtay Haqverdiyev "Şərq”ə bildirib ki, bank sistemi ölkəni qane etmirsə, bununla bağlı siyasət dəyişməlidir: "BVF-nin Azərbaycanda monitorinq keçirməsinin heç bir zərəri yoxdur. Onlar bu monitorinqi keçirməlidirlər və hökumətə də deməlidirlər ki, bu sistemi işlətmək üçün filan işləri görmək lazımdır. Bu, vacibdir. İndiki məqamda hökumət tərəfindən elə bir effektli addım atılmayıb ki, bank sistemi normal vəziyyətə gəlib çatsın. Əlbəttə, BVF-nin məlum açıqlaması bizim xeyrimizədir”.
Ekspertin fikrincə, Azərbaycanda bankların sayı 15-17-dən çox olmamalıdır: "Bir də ki, nizamnamə kapitalı 50 milyondan çox olmalıdır. Çünki 50 milyon azdır. Bu, 200-250 milyon olmalıdır. Onda bankların özünün maliyyə sistemində olan problemlərini həll etməyə imkanı, gücü olacaq. 50 milyonu olan 5-6 bankımız var. Amma Beynəlxalq Bankın nizamnamə kapitalı 7000 milyondur. Demək istəyirəm ki, zəif banklar aradan götürülməlidir. Onlar ayaq altında qalıblar. Zərərindən başqa da heç bir xeyri yoxdur. İnsanlar gedib, ora pul qoyurlar və sonradan bank həmin pulları qaytara bilmir. Bu baxımdan hesab edirəm ki, Azərbaycanda 15-17 sanballı bank olsa, optimal bank sistemi yaratmaq olar”.
Ayyət Əhməd
