8 Avqustda Azərbaycanda Aşura mərasimləri keçirilib. Mərasimlərə uşaqların aparılması onların ağlaşma, zəncir vurma kimi səhnələrə şahidlik etməsi sosial şəbəkələrdə müzakirə mövzusuna çevrilib . İnsanların böyük bir qismi azyaşlıların belə mərasimlərdə iştirakını qınayıb.
Mövzu ilə bağlı “Sherg.az”a danışan ilahiyyatçı Elşad Miri bildirib ki, azyaşlıların aşura mərasimlərində iştirakı məsələsinə valideynlər özləri cavabdehdir:
“ Çünki uşaqlar onların himayəsindədirlər.Qanunvericilikdə belə bir yerlərə getmək üçün xüsusi bir yaş həddi müəyyənləşdirilməyib. Bunun qarşısını inzibati qaydada deyil maarifləndirmə yolu ilə almaq daha məqsədəuyğundur”.
İlahiyyatçının sözlərinə görə, bəzi psixoloqlar hətta qurbanlıq heyvanı belə uşaqların gözü qarşısında kəsməməyi tövsiyə edirlər:
“Bu məsələyə də sırf psixoloji aspektdən yanaşmaq lazımdır. Digər tərəfdən isə ağlaşma, zəncir vurma “Qurani-Kərim”də öz əksini tapmayan ,İslamla əlaqəsi olmayan məsələdir.İnsanlar bunu özləri uyğun bilib tətbiq edirlər. Həzrəti Məhəmməd peyğəmbər (s)in özü sağlığında üç qızı ,üç oğlu dünyadan köçdüyü halda nə belə bir mərasim təşkil edib, nə də belə bir ağlaşma qurub. Buna görə bu cür məsələlər o dövrdə heç vaxt gündəmə gəlməyib”.
