3D xəritəsinin yaradılması, fiziki və hüquqi şəxslərin istifadəsinə verilməsi daha məntiqlidir
“Kim necə istəsə, elə də 3D xəritə yaradır”. Bu sözləri Azərbaycan İnternet Forumunun prezidenti Osman Gündüz deyib. Ekspertin sözlərinə görə, ölkədə bir neçə qurum Azərbaycanın müxtəlif sahələri, dövlət əmlakı, enerji və nəqliyyat infrastrukturu, yaşayış və torpaq sahələri üzrə 3D xəritələrini hazırlayıb: “Ölkəmizdə bu işləri görənlərin hamısı da xarici şirkətlərdi. Halbuki Azərbaycanın 3D xəritəsi əvvəllər Əmlak Məsələləri Dövlət Xidməti tərəfindən də hazırlanırdı.
Ayrı-ayrı dövlət qurumlarının da öz fəaliyyət sahələri üzrə belə layihələrinin olması haqqında zaman-zaman məlumatlar açıqlanır. Yəni ölkədə reallıq ondan ibarətdir ki, müxtəlif infrastruktur və ya dövlət əmlakı sahəsi ilə bağlı müxtəlif qurumlar da 3D xəritələrin hazırlanması üzərində işlər aparırlar. Hər qurumun ayrı-ayrı xarici şirkətlərə özlərinin xəritəsini hazırlatmağındansa, özümüz vahid, normal bir 3D yaradıb ondan istifadə etsək, daha doğru olar. Hesab edirəm ki, Azərbaycanın bütün sahələri üzrə 3D xəritəsinin işlənməsi və tətbiqi olduqca vacib və əhəmiyyətlidir.
İnfrastrukturun planlanması və qiymətləndirilməsi, öncədən təhlillərin aparılması və düzgün qərarların qəbulu, çeviklik və effektivlik, həmçinin şəffaflıq baxımından, bütövlükdə rəqəmsal transformasiya baxımından bu tip texnologiyaların faydası çoxdur.
Düşünürəm ki, aidiyyəti qurumlar, ƏMDX, RİNN bu cür pərakəndəliyə diqqət yetirməlidir. Öncə ölkədə vahid bir 3D xəritəsinin yaradılması, fiziki və hüquqi şəxslərin istifadəsinə verilməsi daha məntiqli olardı. Fikrimcə, indiki yanaşma qüsurludur. Hərənin əlinə bir lazer skaneri alıb, hansısa bir avtomobilin üstünə bağlayıb, yollarda o baş-bu başa sürüb skan edərək 3D xəritələr formalaşdırması doğru deyil”.
