Sadəcə, elə şərtlər təklif etməlidir ki, bu, vətəndaş üçün maraqlı olsun
Azərbaycanda özəl pensiya Fondunun yaranması ilə bağlı müzakirələr yenidən aktuallaşıb. Amma bununla bağlı ekspert rəyləri birmənalı deyil.
Mütəxəssislərin fikrincə, Azərbaycanda özəl pensiya fondu yaradılsa belə, hazırkı iqtisadi şərtlər daxilində özünü doğrultmayacaq. Bu fondlar iqtisadi şəraiti yüksək olan ölkələrdə uğurla fəaliyyət göstərir.
Qeyd edək ki, özəl pensiya fondunun yaradılması üçün normativ hüquqi sənədlərin hazırlanması istiqamətində real işlər görülür. Hökumətdə müzakirələr yekunlaşandan sonra sənəd Milli Məclisə təqdim olunacaq.
Millət vəkili Azər Badamov isə “Sherg.az”a açıqlamasında deyib ki, özəl pensiya fondları ölkəmiz üçün yenilik olsa da, dünya təcrübəsində bu fondlar çoxdan fəaliyyət göstərir və özünü doğruldub:
“Ölkəmizdə də bu təcrübə tətbiq olunarsa, əhəmiyyətli olacağını hesab edirəm. Çünki özəl pensiya fondlarının yaradılması pensiya kapitalının yığılmasında rəqabət mühiti yaradacaq. Burada narahatedici yeganə məqam yaradılacaq özəl pensiya fondunun etibarlılıq səviyyəsinin necə olacağı ilə bağlıdır. Bunun üçün də özəl pensiya fondu yaradılandan sonra elə şərtlər təklif etməlidir ki, bu, vətəndaş üçün maraqlı olsun. Özəl pensiya fondunun yaradılmasının sosial siyasətdə rəqabətlilik yaradacağını hesab edirəm. Rəqabətli hər bir sahədə inkişaf baş verir və bu, vətəndaşların xeyrinə olur”.
