"Məşğulluq haqqında" qanuna edilən dəyişiklik özəl sektorda dövlət hesabına daha çox iş yerlərinin yaradılmasına xidmət edəcək".
Bunu "Trend"ə Milli Məclisin deputatı Vüqar Bayramov deyib.
O bildirib ki, yeni dəyişikliyə əsasən, dövlət İşsizlikdən Sığorta Fondunun vəsaiti hesabına özəl sektorda kvotadan əlavə 15 iş yerinin yaradılmasını dəstəkləyəcək.
"Yəni söhbət müraciət edən hər bir özəl sektorda maksimum 15 iş yerinin yaradılmasından gedir. Praktik olaraq ilkin qiymətləndirmələrə görə təxminən 15 mindən artıq vətəndaşımızın kvotadan əlavə işlə təmin edilməsi mümkün olacaq. Bu zaman onların maaşları dövlət tərəfindən ödəniləcək və onlar özəl sektorda işə cəlb olunacaqlar", - deyə deputat bildirib.
O qeyd edib ki, bu, eyni zamanda, dövlət və özəl tərəfdaşlığının gücləndirilməsinə imkan verəcək, işaxtaranların daha qısa zamanda işlə təmin olunmasına şərait yaradacaq.
"Xüsusən də əmək bazarında daha çox tələb olunan ixtisaslar üzrə dövlət tərəfindən maaşların ödənilməsi həyata keçiriləcək. Kvotadan əlavə iş yerlərinin yaradılması və həmin iş yerlərində çalışanların maaşlarının dövlət tərəfindən ödənilməsi həm özəl sektor üçün işçiləri cəlb etmək baxımından, həm də işsizlərin daha qısa zamanda işlə təmin olunması baxımından yeni bir imkandır", - deyə o əlavə edib.
Qeyd edək ki, qanun layihəsinə əsasən, Azərbaycanda kvotadan əlavə iş yerlərinin yaradılması qaydası müəyyən edilir.
Qanuna əlavə edilməsi təklif edilən yeni maddəyə əsasən, qaydanı müvafiq icra hakimiyyəti orqanının müəyyən etdiyi orqan (qurum) müəyyən edir.
Hər bir işəgötürən üzrə kvotadan əlavə iş yerlərinin sayı işəgötürən üçün müəyyən edilmiş kvota miqdarınadək, lakin 15 (on beş) iş yerindən çox olmamaqla müəyyən edilir.
Kvotadan əlavə iş yerlərində müvafiq icra hakimiyyəti orqanının müəyyən etdiyi orqan (qurum) tərəfindən göndəriş verilmiş şəxslərlə 2 (iki) ildən az olmayan müddətə bağlanılan əmək müqaviləsi üzrə əməkhaqqı bu Qanunun 26.6-cı maddəsi nəzərə alınmaqla, işsizlikdən sığorta vəsaiti hesabına maliyyələşdirilir.
Kvotadan əlavə iş yerləri üzrə əməkhaqqının işsizlikdən sığorta vəsaiti hesabına maliyyələşdirilən hissəsinin məbləği sosial müdafiəyə xüsusi ehtiyacı olan və işə düzəlməkdə çətinlik çəkən şəxslərin kateqoriyaları üzrə müvafiq icra hakimiyyəti orqanının müəyyən etdiyi orqan (qurum) tərəfindən təsdiq edilən faiz dərəcələri tətbiq olunmaqla, müvafiq icra hakimiyyəti orqanının müəyyən etdiyi orqan (qurum) tərəfindən əvvəlki il üçün müəyyən olunmuş ölkə üzrə orta aylıq nominal əməkhaqqından çox olmamaq şərti ilə İşəgötürənlə müvafiq icra hakimiyyəti orqanının müəyyən etdiyi orqan (qurum) arasında bağlanılan müqavilə əsasında müəyyən edilir.
Məqsədli proqramlar müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən müsabiqə yolu ilə seçilən işəgötürənlərin iştirakı ilə həyata keçirilir.
Məqsədli proqramlar müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən müsabiqə yolu ilə seçilən işəgötürənlərin iştirakı ilə həyata keçirilir.
Müsabiqədə aşağıdakı şərtlərə uyğun olan işəgötürənlər iştirak edə bilərlər:
- son bir il ərzində fəaliyyətdə olan və müraciət tarixinə Azərbaycan Respublikasında vergilər və digər icbari ödənişlər üzrə vaxtı keçmiş öhdəlikləri olmayan;
- son bir il ərzində işçilərin sayını azaltmayan və ya iş yerlərini ixtisar etməyən;
- bu Qanunun 18.3-cü maddəsinə uyğun olaraq müvafiq məlumatları vakansiya bankına təqdim edən.
- Dövlət orqanlarının (qurumlarının), bələdiyyə orqanlarının, dövlət və ya bələdiyyə mülkiyyətində olan və ya paylarının (səhmlərinin) nəzarət zərfi dövlətə və ya bələdiyyəyə məxsus olan hüquqi şəxslərin müsabiqədə iştirakına yol verilmir.
Müsabiqədə məqsədli proqramlar üzrə əmək bazarında ən çox tələb olunan peşələr üzrə, sosial müdafiəyə xüsusi ehtiyacı olan və işə düzəlməkdə çətinlik çəkən şəxslər üçün münasib və dayanıqlı iş yerləri yaradan işəgötürənlərə üstünlük verilir. Müsabiqədə qalib olmuş İşəgötürənlə müvafiq icra hakimiyyəti orqanının müəyyən etdiyi orqan (qurum) arasında müvafiq məqsədli proqramın istiqamətləri, tərəflərin hüquq və vəzifələri, habelə məsuliyyəti göstərilməklə məqsədli proqramın həyata keçirilməsinə dair 3 (üç) illik müddətə müqavilə bağlanılır. Müqavilə müddətində. İşəgötürənlərin məqsədli proqramların həyata keçirilməsinə dair digər müsabiqədə iştirakına yol verilmir.
Məqsədli proqramın həyata keçirilməsi çərçivəsində işəgötürən tərəfindən yaradılan və 2 (iki) ildən az olmayan müddətə bağlanılan əmək müqaviləsi ilə müvafiq icra hakimiyyəti orqanının müəyyən etdiyi orqanın (qurumun) göndərişi əsasında işçi qəbul ediləcək hər iş yerinə görə iqtisadi fəaliyyət növlərinin xüsusiyyətləri nəzərə alınmaqla ayrılacaq vəsaitin məbləği müvafiq icra hakimiyyəti orqanının müəyyən etdiyi orqan (qurum) tərəfindən müəyyən edilir.
İqtisadçı ekspert Xalid Kərimli "Sherg.az" a bildirib ki, ölkədə 209 min nəfər işsiz insanın 43.9 faizi qadın, yerdə qalan hissəsi isə kişilərdir:
![](https://milletinsesi.media/images/article/big/1666371277_136.jpg)
“İşsiz kimi qeydə alınmaq üçün, aktiv sürətdə iş axtarmalı və dövlət idarələrinə müraciətlər etməlidir. İşsiz o adama deyilir ki, həm işi yoxdur, həm də aktiv surətdə iş axtarır. İşsizliyə görə sığorta ödənişinin orta aylıq məbləği 407 manat olub. Bu isə insanlara işsiz dövrdə deyil, müəyyən müddətdə, müəyyən şərtlər əsasında verilir. Adətən işsiz şəxslərə 6 ay ərzində işsizlik sığortası ödənilir. Əgər sizin mülkiyyətinizdə pay torpağı varsa, işsiz yox iqtisadi aktiv əhali hesab edilirsiniz. Ölkədə məşğulluq ən çox kənd təsərrüfatındadır. Baxmayaraq ki, kənd təsərrüfatı ilə o qədər şəxs məşğul deyil. Ümumiyyətlə lkədə ümumi iqtisadi fəal əhali 5 milyon 270 min nəfərdir. 4 milyon 980 min şəxs isə məşğul əhali gedir. Məşğul əhalinin 3 də 1 isə kənd təsərrüfatı sahəsinə aiddir. Bu yalançı məşğulluqdur. Çünki qanunvericiliyə görə şəxsin torpağı varsa, həmin şəxs fəaliyyət ilə məşğuldur. Muzdlu işlərlə məşğul olan şəxslər də 1 milyon 750 min nəfər təşkil edir. Onların 900 min nəfəri dövlət sektorunda, 850 min nəfəri isə özəl sektorda işləyir. Ümumiyyətlə Yeni iş yerləri işsiz qalan şəxslərin sayından çox olarsa, işsizlik azala bilər. Ancaq əksi olduqda heç nəyə təsir etməyəcək. Milli Məclisdə qaldırılan məsələ məşğulluq və işsizlik balansına təsir göstərməyəcək”.