Ciddi şəkildə bütün sosial şəbəkələr izlənməli, xüsusi qanun qəbul olunmalıdır
Polis əxlaqsızlığı təbliğ edən "TikTok" istifadəçilərini saxlayıb.
“TikTok” sosial şəbəkəsində müxtəlif adlar altında əyləncə yarışları təşkil edərək əxlaqsızlığı təbliğ edən şəxslərə qarşı polis əməkdaşları tərəfindən tədbirlər görülür.
Vətəndaşların narazılığına səbəb olan "emin_resad" və "azerzahid6669966" adlı istifadəçilər tərəfindən "TikToker"lərin iştirakı ilə təşkil olunan yarışmalarda baş verənlər canlı yayımlanıb.
Cəmiyyətdə birmənalı qarşılanmayan bu hərəkətlərlə bağlı aparılan araşdırmalar çərçivəsində "emin_resad" adlı "TikTok" səhifəsinin idarəçiləri — Abdullayev Emin və Rəşad qardaşları, "azerzahid6669966" adlı səhifənin idarəçisi Azər İsmayılov və digərləri polis əməkdaşları tərəfindən saxlanılıblar.
Məlumatı DİN-in Mətbuat Xidmətindən təsdiqləyiblər. Bildirilib ki, hazırda bu istiqamətdə araşdırmalar davam etdirilir.
Hüquqi və Demokratik İslahatlar Mərkəzinin sədr müavini, sosioloq Elçin Bayramlı “Sherg.az” a bildirib ki, həddən artıq gecikmiş addım olsa da, hər bir halda təqdirəlayiq saymaq olar:
“Uzun illərdir ki, biz bu barədə həyəcan təbili çalırıq, tənqid edirik, ifşaedici faktlar göstəririk. Lakin, açıq şəkildə Azərbaycan xalqına qarşı dövlətin gözü önündə mənəvi terror aksiyası aparılır. İnstagram “TikTok”dan da pis vəziyyətdədir . Həmin sosial şəbəkələrdə qanun yoxdur. İstənilən hər bir şeyi orada törədirlər. Dövlət, xalq, məmurlar, dövlət adamları, bir sözlə hər kəs təhqir olunur, söyüşlərə məruz qalır. İndiyə qədər müvafiq dövlət orqanları harada idi, niyə reaksiya vermirdilər? Bu cür məsələlər cəmiyyətin vecinə deyil. Dövlət ölkədə yaşayan vətəndaşların fiziki və mənəvi sağlamlığını təmin etmək və təhlükəsizliyini qorumaqla məşğuldur. Dövlətin vəzifəsi yalnız bu cümlədən ibarətdir. Əgər dövlət bunu təmin etmirsə, o zaman bu dövlət nəyə lazımdır? Bu ölkədə açıq şəkildə milli mənəvi dəyərlər sistemi çökdürülür. Prezident cənab İlham Əliyev dəfələrlə açıq şəkildə qeyd edib ki, Azərbaycan yalnız öz milli mənəvi dəyərləri üzərində inkişaf etməlidir. Bu dövlət, bu prinsip üzərində qurulmalıdır. Dövlət siyasətinin ana mahiyyəti budur. Amma müvafiq orqanlar, gözardı edərək bu biabırçılıqlara şərait yaradır və göz yumurlar. Bəzi ölkələrdə bu cür şəbəkələr birbaşa bloklanır. Yəni burada dövlətin sərt və güclü müdaxiləsi lazımdır. Sağlam cəmiyyətlərdə insanların özləri dövlətə ehtiyac duymadan bu səhifələri boykot edirlər. Ona görə də dövlət bu məsələ ilə ciddi şəkildə məşğul olmalıdır. Fasiləsiz olaraq ən azı minlərlə şəxs ağır cəzalandırılmalı, kanallar və səhifələr bağlanmalı, xüsusi şəbəkə polisi yaradılmalıdır. Rabitə Nazirliyində, İnformasiya Təhlükəsizlik İdarəsi var. Ancaq gördüyü iş məlum deyil. Deyə bilərlər ki, biz sırf informasiya dezinformasiya məsələsinə baxırıq. Lakin həmin sahədə də işləmirlər və orada biabırçı vəziyyətdədir. Mənəvi terrorla bağlı bir idarə yaradılmalıdır. Ciddi şəkildə bütün sosial şəbəkələr izlənməli, xüsusi qanun qəbul olunmalı və orada bütün şərtlər göstərilməlidir. Yəni Azərbaycan xalqına qarşı mənəvi terror yayan, pozğunluq, narkomaniya, fahişəlik, insan alveri, təbliğatları ilə məşğul olanlar ağır şəkildə cəzalandırılmalı və əmlakı müsadirə olunmaqla ən azı 10 il müddətinə həbs edilməlidir. Yalnız belə ağır cəzalar xalqa qarşı terrorun qarşısını ala bilər”.
