Hazırda hədəfimiz mövcud texniki imkanları bir qədər təftiş edərək, qatarlar arası intervalı bir qədər də azaltmaqdır. İndi 2 qatar cütü sayında xətlərdə hərəkətin bir az da sxılaşdırılması üzərində iş aparılır.
Teleqraf xəbər verir ki, bu barədə jurnalistlərə açıqlamasında “Bakı Metropoliteni” QSC-nin sədrinin müşaviri Emil Əhmədov deyib.
O qeyd edib ki, intervalın azaldılması sərnişinin ən sıx olduğu saatlarda tətbiq olunacaq.
"Bununla bağlı müvafiq monitorinqlər yekunlaşmaq üzrədir. Yeni mövsüm ərəfəsində elan ediləcək. Lakin onu xüsusi qeyd etmək olar ki, intervalın azaldılması üçün əlavə 4 qatarın stansiyadan keçməsi sayəsində 19 min əlavə sərnişin daşınması imkanı yaranacaq. Bu isə illik hesabla təxminən 5 milyon sərnişin artımına bərabər bir rəqəmdir".
Nəqliyyat eksperti Eldəniz Cəfərov “Sherg.az”a bildirdi ki, qatarlar arasındakı intervalın azaldılması üçün yeni stansiyaların və depoların inşası, eləcə də əlavə qatarların gətirilməsi həyata keçirilir:
“Bu prosesin əsas məqsədi sərnişinlərin daha sürətli, yüksək keyfiyyətli və təhlükəsiz daşınmasını təmin etməkdir. Yeni metro xətlərinin istifadəyə verilməsi, həmçinin intervalların optimallaşdırılması istiqamətində aparılan tədbirlər artıq Metropoliten rəhbərliyi tərəfindən əvvəlki açıqlamalarda vurğulanıb və hazırda sistemli şəkildə icra olunur. Bununla yanaşı, qatarların hərəkət cədvəllərinin beynəlxalq standartlara uyğunlaşdırılması və texniki modernizasiya işlərinin aparılması sərnişindaşıma keyfiyyətinin yüksəldilməsində mühüm rol oynayır. İnfrastrukturun genişləndirilməsi və idarəetmə sistemlərinin rəqəmsallaşdırılması nəticəsində nəqliyyatın fasiləsizliyi və operativliyi təmin olunur. Eyni zamanda, təhlükəsizlik standartlarının gücləndirilməsi, fövqəladə hallarda operativ reaksiya mexanizmlərinin tətbiqi sərnişinlərin rahatlığı və təhlükəsizliyi baxımından mühüm əhəmiyyət kəsb edir. Nəticə etibarilə, metro nəqliyyatında həyata keçirilən bu tədbirlər həm şəhərin nəqliyyat yükünün azaldılmasına, həm də ictimai nəqliyyata olan etimadın artmasına xidmət edir”.
