Yaponiyada getdikcə dərinləşən iqtisadi böhran və yaşlanan əhali qeyri-adi bir sahənin yaranmasına səbəb olub: icarəyə nənə xidməti.
Sherg.az "South China Morning Post" qəzetinə istinadən xəbər verir ki, "OK Obaachan" (“OK Nənə”) adlı bu xidmətdə 60 ilə 94 yaş arasındakı qadınlar saatlıq 3 min yen (təxminən 18 dollar) qarşılığında xidmət göstərirlər.
Çoxsaylı funksiyaları var
Yapon mediasına əsasən, bu nənələr yemək bişirməyi öyrətməkdən tutmuş, sevgi münasibətləri barədə məsləhətlər verməyə, uşaq baxıcılığı və ailədaxili vasitəçilik kimi müxtəlif funksiyaları yerinə yetirirlər.
Gəlir ehtiyacına çarə
2011-ci ildə yalnız qadınlara məxsus bir şirkət tərəfindən başlanan bu xidmət hazırda 100-ə yaxın nənəni aktiv şəkildə işlə təmin edir. Bu həm yaşlı qadınlara sosial fəaliyyət imkanı yaradır, həm də onların maddi ehtiyaclarına müəyyən qədər cavab verir. Nənələrə nəqliyyat xərcləri üçün əlavə olaraq 3 min yen də ödənilir.
Arxasında acı reallıq var: Əhali sürətlə yaşlanır
Lakin bu xidmətin yaranmasının arxasında ürəkaçan səbəblər yoxdur. Yaponiyada əhali sürətlə yaşlanır — 65 yaşdan yuxarı insanların sayı 36 milyonu keçib və bu, ölkə əhalisinin təxminən üçdə biri deməkdir. Doğum səviyyəsi isə tarixdə ən aşağı həddədir. Maaşlar artmır, inflyasiya isə hər keçən gün alıcılıq qabiliyyətini azaldır.
Zövq üçün deyil, məcburiyyət üçün işləyirlər
2025-ci ilin may ayında ölkədə real maaşlar 2,9% azalıb, inflyasiya isə 3,7%-ə çatıb. Artan yaşam xərcləri səbəbilə yaşlılar işləməyə məcbur qalır. Rəsmi məlumatlara görə, Yaponiyada yaşlıların dörddə biri hələ də işləyir. Onların çoxu bu işi zövq üçün deyil, gəlirə ehtiyac duyduqları üçün edir.
Həbsxana çıxış yolu kimi görülür
Vəziyyət o qədər pisləşib ki, bəzi yaşlılar yaşamaq üçün həbsxananı çıxış yolu kimi görməyə başlayıb. Yaxınlarda 81 yaşlı bir qadın yalnız yemək və tibbi xidmət ala bilmək üçün marketdən ərzaq oğurladığını etiraf edib.
