Lənkəran Şəhər Rayon Polis Şöbəsinin əməkdaşlarının keçirdikləri növbəti əməliyyat-axtarış tədbirləri nəticəsində narkotik vasitə və “patı”, “şüşə” kimi tanınan psixotrop maddənin qanunsuz dövriyyəsi ilə məşğul olan 16 nəfər rayon sakini saxlanılıb. Daxili İşlər Nazirliyinin mətbuat xidmətinin Lənkəran regional qrupundan verilən məlumata görə, Lənkəran Şəhər Rayon Polis Şöbəsinin əməkdaşlarının keçirdikləri əməliyyat tədbirləri ilə narkotik vasitələrin qanunsuz dövriyyəsində şübhəli bilinən rayon sakini Valeh Bayramlı saxlanılıb.
Onun üzərindən 147 qram psixotrop maddə metamfetamin və 105 qram narkotik vasitə heroin, bir ədəd elektron tərəzi aşkarlanaraq götürülüb. Şöbə əməkdaşlarının keçirdiyi digər tədbirlərlə Lənkəran rayon sakinləri Rahid Rəhimov, Əfqan Muradov, İman Bağırov, Elşən Yaqubov, Natiq Bağırov, Cavid Məmmədov, Rahid Əliyev, Elada Qasımova və evində tiryəkxana təşkil edən Oqtay Hüseynov saxlanılıb. Onlardan ümumilikdə 48 bükümdə heroin və metamfetamin, iki ədəd elektron tərəzi aşkarlanaraq götürülüb. Lənkəran Şəhər Rayon Polis Şöbəsinin Liman polis bölməsinin əməkdaşlarının keçirdikləri ardıcıl əməliyyat tədbirləri ilə rayonun Göyşaban kənd sakinləri Anar Xəlilov, Həsən Qurbanov, Rasim Cavadov, Cəfər Mustafayev, Qiyamət Abızadə və Valeh Nəcəfov saxlanılıblar. Onlardan ümumilikdə 54 ədəd bükümdə heroin və metamfetamin, altı ədəd elektron tərəzi aşkarlanaraq götürülüb. Faktlarla bağlı araşdırma aparılır.
Hüquq müdafiəçisi Novella Cəfəroğlu “Sherg.az”a açıqlamasında narkotik vasitələrin istifadəsinə qarşı mübarizə metodlarından danışdı:
“Qanunda hansısa dəyişikliyə ehtiyac yoxdur. Məsələ ondan ibarətdir ki, həbsdən çıxan şəxs yenidən bu işlə məşğul olur. Odur ki, problemi kökündən həll etməkdən ötrü ictimai qınaq formalaşmalıdır. Vətəndaş cəmiyyəti bu işdə fəal olmalı, psixoloji söhbətlər aparılmalıdır. Lakin ən çox məsuliyyət polislərin üzərinə düşür. Hansı rayonda narkotik maddələrdən istifadə olunursa, deməli, oranın polis işçiləri birbaşa günahkardırlar”.
