Zəlimxan Məmmədli:“ səhiyyəmizdə islahatlar yoxdur, özəl sektor himayə altındadır, dövlət səhiyyə sistemi isə çox pis vəziyyətdədir”
“Belə olan halda orta və kasıb təbəqələrimiz bu xidmətdən istifadə etməkdə çətinlik çəkir. Kredit alırlar, maşınlarını satırlar, sonra həmin kreditin altından çıxa bilmirlər. Bunun öz də bir dərd olur və əlavə xəstəlik qazanırlar”
Bu il müalicə üçün İrana 1.2 milyona yaxın azərbaycanlı üz tutub. 2019-cu ilin yanvar-iyul aylarında 3 milyon 115,1 min nəfər Azərbaycan vətəndaşı xarici ölkələrə səfər edib.
Dövlət Sərhəd Xidmətindən verilən məlumata görə, bu əvvəlki ilin müvafiq dövrü ilə müqayisədə 23,9 faiz artıqdır. Ölkə vətəndaşlarının 37,8 faizi İrana, 28,1 faizi Gürcüstana, 17,7 faizi Rusiya Federasiyasına, 11,0 faizi Türkiyəyə, 5,4 faizi digər ölkələrə gedib. Başqa sözlə, Bu dövrdə İrana 1 177,5 min nəfər, Gürcüstana 875 min nəfər, Rusiyaya 551,4 min nəfər, Türkiyəyə isə 342,5 min nəfər azərbaycanlı səfər edib.
Statistik göstəricilərlə bağlı fikirlərini “Sherg.az”la bölüşən “Borçalı” İctimai Birliyinin sədri, həkim Zəlimxan Məmmədli söyləyib ki, bütün bunlar səhiyyə sistemimizdəki naqisliyin təzahürüdür.
Həkim qeyd edib ki, səhiyyəmizdə islahatlar yoxdur, özəl sektor himayə altındadır, dövlət səhiyyə sistemi isə çox pis vəziyyətdədir:
“Əhalinin əhəmiyyətli bir hissəsi özəl klinikalarda müasir müayinə metodlarından yararlanmaq üçün yaxşı maddi imkana malik deyil. Analizlər kifayət qədər bahadır və bir insan “Chek-up” müayinə üçün hər hansı klinikaya gedirsə, təxminən 500 manata qədər pul xərcləməlidir. Kasıb təbəqənin isə belə bir məbləği ödəməyə imkanı çatmır.
Hələ müayinələrdən sonra müvafiq müalicələr də var. Ona görə də hər kəs İrana üz tutur. Çünki İranda qiymətlər nisbətən ucuzdur. İnsanlarımız əziyyət çəkib gedirlər və ucuz qiymətə müayinə olunub daha az dərmanlarla, yüklənmədən müalicə prosedurları ala bilirlər. Sosial durumun yaratdığı təzahür burada mühüm rol oynayır”.
Z.Məmmədlinin fikrincə, 1.2 milyona yaxın azərbaycanlının İrana üz tutması utanc gətirici bir məqamdır:
“Demirəm ki, İranda səhiyyə sistemi idealdır. Hər halda Amerika sistemidir. Azərbaycanın öz nefti, qazı, intellektual imkanları kifayət qədər çoxdur. Təəsüf ki, səhiyyəmizdə öyünəcək hallarımız çox azdır. Bunu da islahatların olmaması ilə əlaqələndirirəm. Gürcüstanda icbari tibbi sığorta həyata keçirilir. Azərbaycanda isə hələ pilot layihələr hazırlayırlar.
Birmənalı şəkildə ölkəmizdə bu layihələr tətbiq olunmalıdır. Əhalinin əhəmiyyətli bir hissəsi dövlətin onun sağlığının yanında olmasına əmin olmalıdır. Belə olan təqdirdə xəsətələrimizin kənara gedişləri azalacaq və tibb personalımız işini daha yüksək səviyyədə görəcək”.
Həkim sözlərinə görə, özəl klinikların qiymət meyarları anormal və kifayət qədər soyğunçudur:
“Belə olan halda orta və kasıb təbəqələrimiz bu xidmətdən istifadə etməkdə çətinlik çəkir. Kredit alırlar, maşınlarını satırlar, sonra həmin kreditin altından çıxa bilmirlər. Bunun öz də bir dərd olur və əlavə xəstəlik qazanırlar.
Ona görə də səhiyyəmizdə ciddi şəkildə islahatlara ehtiyac var. Birinci olaraq Azərbaycan səhiyyəsi modernləşməlidir. Genetik və intellektual imkanlarımıza uyğun olaraq yüksək səviyyədə islahat aparılmalıdır ki, insanlarımız səhiyyə müəssisələrinə ağrı ilə gəlib gülə-gülə getsinlər”.
