“Milli Hərəkat Partiyasının planı (keçmiş prezident Mixail) Saakaşvilinin hakimiyyətə qayıdışı ilə bağlıdır, hökumət bunun qarşısını almaq üçün hər şeyi edəcək”.
Teleqraf xəbər verir ki, bunu Gürcüstan parlamentin vitse-spikeri Gia Volski bildirib.
“Paata Burçuladzenin mövzusu ona görə aktuallaşıb ki, o, irəli getmək və müxalif hərəkatda populyarlığını qorumaq üçün fantazmaqorik ssenarilərdən istifadə etmək qərarına gəlib. O, bayraqla gəzəndə gürcü bayrağını təhqir edir. Ümumiyyətlə, qeyri-adekvat insan təəssüratı yaradır. Açıq şəkildə Milli Hərəkatın vəsiqələrini göstərib, “Qan tökmək lazımdır” deyir. Bu, onların (müxalifətin) fikridir və bu fikir artıq səsləndirilib”, - vitse-spiker bildirib.
Müxalif siyasətçi Paata Burçuladze bundan əvvəl Gürcüstanda inqilab elan olunduğunu açıqlayıb.
Milli Hərəkata gəlincə, lideri Mixail Saakaşvili olan partiya oktyabrın 4-də Tbilisidə izdihamlı mitinq və küçə yürüşləri elan edib. Eks-prezident vətəndaşlar və tərəfdarlarına müraciət edərək, onları həmin gün fəal olmağa, küçələrə çıxmağa çağırıb.
Oktyabrın 4-də Gürcüstanda parlament seçkiləri keçiriləcək.
