Gürcüstanın sabiq prezidenti Mixail Saakaşvili hökmünə münasibət bildirib.
O bu hökmün onun üçün ömürlüyə bərabər olduğunu qeyd edib:
“Oliqarxın hökmü necə də sürpriz oldu, hə? Mən Prezident Administrasiyasının rəsmi xərclərinə görə praktiki olaraq ömürlük həbsə məhkum edildim. Bizi qorxuda bilməzlər. Güc birlikdədir!”.
Gürcü siyasətçi iki cinayət işi üzrə qiyabi olaraq mühakimə olunub və ümumilikdə 6 il müddətinə azadlıqdan məhrum olunub. O, hazırda az qidalanma səbəbindən yaranan kaxeksiya xəstəliyindən müalicə olunur. Həkimlər onun səhhətinin getdikcə yaxşılaşdığını qeyd edib.
Politoloq Aytən Qurbanova "Sherg.az"a deyib ki, qərarın indiki məqamda qəbul edilməsi Gürcüstanda etirazları təşviq edən qüvvələrə qarşı mesajları da özündə ehtiva edir:
"Çünki Qərbin “Gürcüstan layihəsi” ölkədə keçirilmiş son iki seçkinin nəticəsində demək olar ki, uğursuzluğa düçar olub. Məhz bunun nəticəsində Gürcüstana qarşı qərəzli bəyanatların və əsassız ittihamların səsləndirilməsi daha intensiv xarakter alıb. Amma düşünürəm ki, kollektiv Qərbin ənənəvi ritorikası artıq öz təsir gücünü itirib və bu çıxışların əsl mahiyyəti də ifşa olunub. Ona görə də, hakim Gürcü arzusu partiyasının siyasi kursunda cidi dəyişikliklər ola biləcəyi ehtimalı çox aşağıdır. Yəni Qərbin məkrli ssenarilərinə baxmayaraq, Gürcüstan hakimiyyətinin balanslı siyasət yanaşması xarici siyasət konsepsiyasının əsasını formalaşdırır və bu istiqamətdə qətiyyətli mövqe nümayiş etdirilir".
