Məhkəmə Trampın sabiq müşaviri Rocer Stounu yalançı şahidlikdə, ədalət mühakiməsinin qarşısını almaqda və başqa şahidi yalan ifadə verməyə təhrik etməkdə təqsirli bilib.
ABŞ KİV-nin yaydığı məlumata əsasən, Stouna hökm fevralın 6-da oxunacaq, o, 20 ilədək həbs oluna bilər. Söhbət 2016-cı ildə ABŞ-da prezidentlik kampaniyası zamanı pozuntuların araşdırılmasından və Rusiyanın seçkilərə mümkün müdaxiləsindən gedir.
Eləcə də, məhkəmə andlıları (prisyajnı - red.) Stounun demokratları ləkələyən məlumatları əldə etmək üçün “Wikileaks” saytının nümayəndəsi ilə əlaqə qurduğunu müəyyən edib.
Donald Tramp məhkəmənin qərarını ikili standartlar siyasətinin təzahürü adlandırıb. O özünün “Twitter” səhifəsində bildirib ki, seçkilərdə demokratlardan olan namizəd Hillari Klinton, MKİ-nın keçmiş rəhbəri Riçard Brennan və Rusiya üzrə xüsusi prokuror Robert Müllerin yalan danışıb-danışmadıqları barədə də düşünmək yerinə düşər.
Xatırladaq ki, Müllerin istintaqı 2019-cu ilin mart ayında başa çatıb. Stone onun fiqurantlarından biri idi. Xüsusi prokuror Rusiya nümayəndələrinin seçkiqabağı yarışa müdaxilə etmək cəhdlərini üzə çıxarıb, amma Trampla Rusiya arasında sövdələşməni sübut edə bilməyib.