Razılaşma müharibənin daha şiddətli mərhələyə keçməsi deməkdir
"Zelenski lider olaraq çətin vəziyyətdədir. Çünki onun qələbəsindən pay götürənlər çox olacaq, amma məğlubiyyətinə heç kim şərik olmayacaq"
Rusiya-Ukrayna danışıqlarının ikinci raundu da geridə qaldı. Ukrayna prezident ofisi sədrinin müşaviri Mixail Podolyakın məlumatına görə, tərəflər müvəqqəti atəşkəsi və humanitar dəhlizlərin birgə təmin edilməsinə dair razılığa gəliblər: “Ukrayna nümayəndə heyəti gözlədiyi nəticəni əldə etməyib və dialoqu danışıqların üçüncü raundunda davam etdirəcək”.
Siyasi şərhçi Asif Nərimanlı “Şərq”ə bildirib ki, atəşkəsin əldə edilməsi ərzaq və dərmanların çatdırılmasına şərait yaradılacaq. Onun sözlərinə görə, hər iki tərəfin buna ehtiyacı var:
Əgər razılaşmaya əməl edilərsə, Ukrayna zirzəmilərdə, eləcə də atəş altında qalan vətəndaşlarının evakuasiyasına nail olacaq. Ərzaq və dərman böhranı müəyyən qədər həll ediləcək və əlavə silahlar əldə etmək ehtimalı üçün zaman qazanacaq. Rusiya isə ordunu yenidən toparlaya və gücləndirə biləcək, dağılmış koordinasiyanı bərpa edəcək. Bu, müharibənin başa çatması yox, əksinə, daha da şiddətli mərhələyə keçməsi deməkdir.
Putin Makronla telefon söhbətində maksimal hədəflərinə nail olana qədər dayanmayacağını deyib. Yelisey sarayının rəsmi məlumatında “Prezident Makron həmkarı Putinin dediklərini nəzərə alaraq, ən pis vəziyyətin hələ qarşıda olduğu qənaətinə gəlib” deyilir. Putinin bir addım da olsun geri çəkilməməsinin səbəbi “çəkilməyə yerinin” olmaması ilə yanaşı, Ukraynanın Qərbdən lazımi qədər dəstək ala bilməməsidir.
Zelenskinin mətbuat konfransındakı açıqlamaları da bundan xəbər verir. Zelenskinin çıxışının ümumi məğzi budur ki, “dünya Ukraynaya dəstək məsələsində gec qaldı”.
A.Nərimanlıya görə, Kiyevin ən çox ehtiyacı olduğu iki məsələdə heç bir irəliləyiş yoxdur:
“Ya hava məkanı uçuşa qadağan olunmalı, ya da döyüş təyyarələri verilməlidir. Rusiya Ukrayna şəhərlərini bombalayarkən, Qərbdə dəstəklə bağlı aparılan müzakirələr zaman alır. Zelenskinin sözləri dəstək məsələsində Qərb cəbhəsini birləşdirməyə hesablanmış kimi görünə bilər.
Lakin hadisələrin inkişafı və Putinin artan aqressiyası fonunda Ukrayna üçün vəziyyətin ürəkaçan olmadığını da göstərir.
Zelenski lider olaraq çətin vəziyyətdədir. Çünki onun qələbəsindən pay götürənlər çox olacaq, amma məğlubiyyətinə heç kim şərik olmayacaq. Ukrayna prezidentinin açıqlamaları Putinin önünü açır.
Müvəqqəti atəşkəs razılaşması Rusiya ordusuna yenidən özünə gəlmək imkanı verəcək və Moskva köməksiz görünən Ukraynaya daha aqressiv hücumlar təşkil edəcək”.
