Ukrayna ordusu əks-hücumun ikinci dalğasına hazırlaşır.
“Report” xəbər verir ki, bunu Almaniyanın “Bild” qəzeti yazıb.
Məlumata görə, Ukrayna Prezidenti Volodimir Zelenski ABŞ-ın Aspene şəhərində təhlükəsizlik məsələləri üzrə forumdakı çıxışında Ukrayna Silahlı Qüvvələrinin kifayət qədər ehtiyatla hücuma keçdiyini etiraf edib: “Ancaq indi əks-hücumların sürətinin arta biləcəyi an yaxınlaşır”.
ABŞ dövlət katibi Antoni Blinken də bu yaxınlarda oxşar bəyanatla çıxış edərək, Ukrayna ordusunun əks-hücum əməliyyatının nəticələrindən danışmağın tez olduğunu vurğulamışdı.
Bu günlərdə Ukrayna Silahlı Qüvvələrinin polkovniki Sergey Baranov bildirib ki, Rusiya ordusunun itkilərinin təxminən 90 faizi Ukraynanın raket və artilleriya bölmələrinin payına düşür. O, yaradılan zərbə qruplarını Qərbin uzaqmənzilli silahlarını "odlu yumruq" adlandırıb.
ABŞ-ın Müharibə Araşdırmaları İnstitutunun (ISW) analitikləri hesab ediblər ki, bu hücumlar Rusiya qoşunlarını uğurla məhv edir, ukraynalılar yeni hücuma hazırlaşır.
