Birləşmiş Millətlər Təşkilatının (BMT) İnsan Haqları başçısı Volker Türk, 2023-cü ildə qlobal münaqişələrdə əvvəlki ilə nisbətən üç dəfə çox uşaq və iki dəfə çox qadın öldüyünü və ümumi mülki ölümlərin yüzdə 72 artdığını bildirib.
Sherg .az xarici mediaya istinadən xəbər verir ki, Volker Türk Cenevrədə BMT İnsan Haqları Şurasında deyib ki, müharibə edən tərəflər getdikcə “məqbul və qanuni olanın sərhədlərini zorlayırlar”.
Bəyanatda deyilir ki, tərəflər bir-birinə tam hörmətsizlik edir və insan hüquqlarını əsaslı şəkildə pozurlar.
Türk açıqlamasında deyib ki, mülki əhalinin öldürülməsi və yaralanması, həyati əhəmiyyətli infrastrukturların məhv edilməsi gündəlik hadisəyə çevrilib. Uşaqlar güllələnib. Xəstəxanalar bombalanıb. Bütün camaatlara ağır artilleriya atılıb. Bütün bunlar nifrət dolu, bölücü və insanlıqdan kənar ritorika ilə yanaşı baş verib.
