NATO-nun Baş katibi Yens Stoltenberq Beynəlxalq Krım Platformasının IV Sammitinə ünvanladığı müraciətində bildirib ki, müttəfiqlər gələn il ərzində Ukraynaya 40 milyard avro ayırmaq niyyətindədir. Stoltenberq vurğulayıb ki, NATO-nun dəstəyi Ukraynaya bu gün özünü müdafiə etməyə və gələcəkdə Rusiya hücumlarının qarşısını almağa kömək edəcək. O bildirib ki, Ukraynanın gələcəyi NATO-dadır və o, üzvlük üçün dönməz yoldadır. NATO-nun davamlı köməyi ilə Ukrayna suveren, müstəqil və demokratik dövlət kimi qalib gələcək.
Hərbi-siyasi ekspert Həşim Səhrablı “Sherg.az”a söyləyib ki, Stoltenberqin dediyi kimi Ukrayna müharibədə qalib gələ bilər. Amma buna görə Avropadan istər NATO, istərsə də, müxtəlif dövlətlər səviyyəsində həlledici dəstək almalıdır:
![](https://sherg.az//storage/posts/July2024/FsrWjcX2x5MIrkHd36ph.png)
“Yəni yardımlar bu gün Ukraynaya ayrılan maddi və texniki dəstəkdən daha çox olmalıdır ki, rəsmi Kiyev Rusiyanın sahədə əldə etdiyi texniki hərbi üstünlüyü aradan qaldıra bilsin. Hazırda Ukraynaya verilən silahlar isə rəsmi Kiyevin meydanda üstünlüyü öz xeyrinə dəyişməsinə imkan yaratmır. Sual yaranır ki, NATO ölkələrinin təşkilat və ayrı-ayrı ölkələr səviyyəsində sahib olduğu müasir silahlar, əsas qırıcılar, uzaqmənzilli raketlər haradadır? Niyə həmin texniki avadanlıqlar Ukraynaya verilmir? Ümumiyyətlə Ukraynaya dəstəklər lazım olan formada və çəkinmədən verilərsə, rəsmi Kiyev qalib gələ bilər. Ancaq NATO və Qərb dövlətləri Rusiya ilə münaqişə yaratmayacaq şəkildə Ukraynaya yardım ayırırlar. Yəni Ukraynaya özlərinə sərf edəcək formada dəstək göstərirlər. Bu isə heç vaxt Ukraynanın qələbə qazanmasına imkan yaratmır. Stoltenberq həqiqətən rəsmi Ukraynanın qalib gəlməsini istəyirsə, Kiyevə lazım olan formada dəstək ayrılmalıdır. Əgər yardımlar eyni formada verilməyə davam edərsə, üstündən on il də keçsə, Ukrayna müharibədə qalib olmayacaq".