Estoniya aparılan fikir mübadiləsi sadəcə olaraq diplomatik nəzakət məsələsidir
Ermənistan Baş naziri Nikol Paşinyan Tallində Estoniya Prezidenti Alar Karislə görüşüb. Bu barədə Ermənistan rəhbərinin mətbuat xidməti məlumat yayıb.Həmsöhbətlər görüşdə ikitərəfli məsələlərlə yanaşı, Ermənistan-Azərbaycan sülh prosesinə də toxunublar.
Alar Karis iki ölkə arasında sülh sazişi üzrə əldə olunmuş razılaşmanı alqışlayıb və onun ən qısa zamanda imzalanacağına ümid etdiyini bildirib. Estoniya prezidenti ölkəsinin Cənubi Qafqazda davamlı sülh və sabitliyin təmin edilməsi üzrə səyləri dəstəklədiyini təsdiqləyib. Tərəflər həmçinin Ermənistan-Avropa İttifaqı əlaqələrinin gələcək inkişafı və əməkdaşlığın genişləndirilməsi ilə bağlı fikir mübadiləsi aparıblar.
Siyasi şərhçi Azər Həsrət Sherg.az-a deyib ki, Estoniya Avropa Birliyinin nisbətən kiçik ölkələrindən biri olsa da, keçmiş sovet respublikaları kimi Azərbaycan-Ermənistan arasındakı prosesləri yetərincə düzgün dəyərləndirməyi bacaracaq dövlətdir:
“Bu baxımdan Estoniyanın Azərbaycan-Ermənistan arasında normallaşma prosesiylə bağlı ümidlərini ifadə etməsi yerinə düşür. Azərbaycan hər zaman bildirib ki, bizim ikitərəfli münasibətlərin tənzimlənməsinə üçüncü tərəflərin müdaxiləsinə ehtiyac yoxdur. Vasitəçi olmadan Azərbaycan-Ermənistan öz aralarında hər bir məsələni həll edə bilər. Təbii ki, üçüncü tərəfləri məlumatlandırmaq, onlarla məsləhətləşmələr aparmaq Azərbaycan və Ermənistanın suveren hüquqlarıdır. Lakin hər iki dövlət anlaşmanı biri-biriylə edəcəklər. Azərbaycanın mövqeyi Ermənistan tərəfindən də anlayışla qarşılanır. Estoniya aparılan fikir mübadiləsi sadəcə olaraq diplomatik nəzakət məsələsidir”.
