İspaniyanın "Barselona" Futbol Klubunun Bakıda açılacaq akademiyası ilə bağlı işlərə başlanılıb.
Sherg.az "Report"a istinadən xəbər verir ki, akademiyanın yerləşəcəyi "ASK Arena"da təmir-bərpa, yenidənqurma işləri aparılır.
Sahəsi təxminən 9500 kvadratmetr olan əsas meydannın, eləcə də sahəsi təxminən 4200 kvadratmetr olan yardımçı məşq meydançasının bərpası və yeni qazon örtüyünün quraşdırılması AzFar şirkəti tərəfindən icra olunur.
Layihə çərçivəsində aşağıdakı işlərin görülməsi də nəzərdə tutulur:
- Futbol meydançalarının işıqlandırılması üçün nəzərdə tutulmuş lampaların müasir tələblərə uyğun şəkildə yenilənməsi;
- İdmançılar və klub heyəti üçün nəzərdə tutulmuş paltardəyişmə otaqlarının, sanitar qovşaqlarının, texniki və yardımçı otaqların əsaslı təmir edilməsi;
- Yuxarıda qeyd olunan otaqların yerləşdiyi inzibati sahədə havalandırma və kondisionerləşdirmə sistemlərinin qurulması və tam şəkildə istismara verilməsi;
Onu da əlavə edək ki, "Barselona" rəhbərliyinin akademiya açmaq ideyası Asiya ölkələrində həyata keçirilən tədbirlər zamanı ortaya yaranıb. Bununla bağlı klub prezidenti Xuan Laporta bu il martın 1-də ölkəmizə səfər edərək Azərbaycan Respublikasının Prezidenti İlham Əliyevlə görüşüb.
