Samir Hümbətov: "Sülh müqaviləsinin paraflanması buzların əriməsinə və münasibətlərin qurulmasına səbəb hesab oluna bilər"
Çində keçirilən Şanxay Əməkdaşlıq Təşkilatının (ŞƏT) sammiti çərçivəsində Ermənistanın xarici işlər naziri Ararat Mirzoyan və Pakistanın XİN rəhbəri İshaq Dar arasında görüş baş tutub. Görüş barədə Ermənistanın Xarici İşlər Nazirliyinin mətbuat xidməti məlumat yayıb və qeyd edib ki, tərəflər diplomatik münasibətlər qurmaq barədə qərar qəbul ediblər. Həmsöhbətlər Ermənistan və Pakistan arasında diplomatik münasibətlərin qurulması qərarını məmnunluqla qeyd ediblər və ikitərəfli əməkdaşlığın inkişaf perspektivlərini müzakirə ediblər. Həmçinin, regional hadisələrə toxunan Ararat Mirzoyan Ermənistanın Cənubi Qafqazda sabit sülhün bərqərar olması istiqamətində səylərini təqdim edib. Bu kontekstdə Ermənistan və Azərbaycan arasında sülhün bərqərar olduğunu vurğulayıb.
Politoloq Samir Hümbətov "Sherg.az"a deyib ki, Pakistanın bugünə kimi Ermənistanı dövlət kimi tanımamasının ən başlıca səbəbi kimi Azərbaycan ərazilərinin işğalı və tərəflər arasında mövcud olmuş münaqişə hesab edilirdi. Ekspertin sözlərinə görə, 8 avqust 2025-ci ildə Vaşinqtonda reallaşan Azərbaycan və Ermənistan arasında sülh müqaviləsinin paraflanması buzların əriməsinə və münasibətlərin qurulması üçün səbəb hesab oluna bilər:
"Son günlər Türkiyənin də Ermənistanla diplomatik əlaqələri quracağı ilə bağlı açıqlamalar eşidirik. Baş verən son proseslərdən belə qənaətə gəlmək olar ki, 8 avqust 2025-ci il Vaşinqton anlaşması təkcə Ermənistan-Azərbaycan arasında deyil, eyni zamanda Ermənistan-Pakistan, Ermənistan-Türkiyə arasında da əlaqələrin qurulmasına imkan yaratdı. Əlbəttə, baş verən proseslər bəzi ölkələrin, xüsusilə Hindistan, Yunanıstan və Fransa kimi ölkələrin arzulamadığı yöndə cərəyan etsə də, dəyişən yeni dünya nizamında tərəflər istənilən halda ilk növbədə öz maraqlarını düşünməyə məcburdurlar".
