ABŞ İrana qarşı sanksiyalar siyahısına daha 35 təşkilatı və bir Misir vətəndaşını əlavə edib.
Teleqraf xəbər verir ki, müvafiq bildiriş ABŞ Maliyyə Nazirliyinin Xarici Aktivlərə Nəzarət İdarəsinin saytında yerləşdirilib.
Bu məlumatlara görə, hava nəqliyyatı sektorunda fəaliyyət göstərən 35 aviaşirkətə və digər şirkətlərə məhdudiyyətlər tətbiq edilib. Bunlara İran, BƏƏ, Böyük Britaniya, Malayziya, Türkiyə və Qazaxıstanda yerləşən şirkətlər daxildir. ABŞ Maliyyə Nazirliyinin mətbuat xidməti tərəfindən yayımlanan açıqlamada sanksiyaların İranın aviasiya sənayesinə təzyiq göstərmək üçün tətbiq edildiyi və bunun İran silahlı qüvvələrinə silahların, hərbi personalın daşınmasını asanlaşdırdığı iddia edilir.
ABŞ Maliyyə Nazirliyi həmçinin 23 sentyabr tarixinə qədər sanksiya siyahısına daxil edilmiş fiziki və hüquqi şəxslərlə bağlı maliyyə əməliyyatlarının başa çatdırılması üçün zəruri olan əməliyyatlara icazə verən ümumi lisenziya verib. Eyni zamanda, ABŞ hakimiyyəti ABŞ istehsalı olan təyyarələrin İranda müvəqqəti olmasına, eləcə də İslam Respublikasına ehtiyat hissələri və təmir texnologiyalarının idxalına icazə verən lisenziyanı ləğv edib.
