BMT-nin Baş katibi Antonio Quterreş Mərkəzi Afrika Respublikasında Mərakeş kontingentindən olan sülhməramlının öldürülməsini müharibə cinayəti hesab edir və ölkə hakimiyyətini cinayətkarların tapılıb məsuliyyətə cəlb edilməsi üçün bütün səyləri göstərməyə çağırır.
APA xəbər verir ki, bu barədə bəyanat şənbə günü təşkilatın saytında dərc olunub.
“Baş katib noyabrın 24-də CAR-ın cənub-şərqindəki Obo aerodromuna bir mərakeşli sülhməramlının ölümü ilə nəticələnən hücumu qətiyyətlə pisləyir”, - bəyanatda deyilir.
Bununla yanaşı bildirilir ki, Birləşmiş Millətlər Təşkilatının sülhməramlılarına hücumlar beynəlxalq hüquqa əsasən müharibə cinayəti sayıla bilər: “Biz CAR rəhbərliyini bu faciənin səbəbkarlarının tezliklə məsuliyyətə cəlb edilməsi üçün hər cür səy göstərməyə çağırırıq”.
Qeyd edək ki, CAR-da BMT-nin Çoxsahəli İnteqrasiya edilmiş Sabitləşdirmə Missiyası 2014-cü ilin yazında BMT Təhlükəsizlik Şurasının qərarı ilə yaradılıb.
