Tehranda müəyyən əminlik var ki, ABŞ indiki vəziyyətdə İranla birbaş savaşa girmək istəmir
“İran-ABŞ danışıqlarının mümkün uğursuzluğu nəticəsində münaqişə baş verərsə, qarşı tərəfin itkiləri mütləq bizimkindən çox olacaq”.
Bunu İran müdafiə naziri Əziz Nəsirzadə deyib.
Danışıqların nəticəsiz qalacağı təqdirdə qarşı tərəfin hərbi təhdidləri ilə bağlı İranın hansı addımları atacağı barədə jurnalistlərin suallarına Ə.Nəsirzadə belə cavab verib:
“İran xalqı və silahlı qüvvələr adından deyirəm ki, Allahın izni ilə, bu, münaqişəyə səbəb olmayacaq, amma münaqişə olarsa, qarşı tərəfin itkiləri mütləq bizimkindən çox olacaq. Bütün Amerika bazaları nəzarətimizdədir və biz heç bir şeyi nəzərə almadan ev sahibi ölkələrdəki o bazaları hədəfə alacağıq”.
Politoloq Natiq Miri Sherg.az-a söyləyib ki, Əziz Nəsirzadənin fikirləri daha çox çəkindirmək xarakter daşıyır:
"İran ABŞ-yə hərbi müdaxilə ilə bağlı təzyiq edir ki, danışıqlar masasında istədiyi nəticəni alsın. Yəni, "əgər itkilər istəmirsinizsə, onda Tehranla razılaşmaq məcburiyyətindəsiniz" fikrini aşılamağa çalışır. Lakin bunlar sadəcə sözdən ibarətdir. İran müdafiə nazirinin söylədikləri psixoloji savaşın bir hissəsidir. Eyni zamanda Tehranda müəyyən əminlik var ki, ABŞ indiki vəziyyətdə İranla birbaş savaşa girmək istəmir. Burada həqiqət yükü mövcuddur".
Analitik əlavə edib ki, Donald Tramp nəinki İran, heç bir ölkə ilə münaqişə niyyətində deyil:
"Əksinə, seçkilərdən öncə vəd etdiyi məsələləri həll yoluna qoymaq üçün çalışır ki, Nobel mükafatına layiq görülsün. Nəticə etibarilə, Ağ Evin sahibi tarixə düşmək istəyir. Buna görə də Tramp İranla danışıqlarda razılığa gələrək masa arxasında sülh görüntüsü vermək niyyətindədir".
