Paris həqiqətən regionda sülh istəyirsə, prosesə qarışmamalıdır
Fransa uzun müddət Azərbaycana, bütövlükdə türk dünyasına qarşı qərəzli mövqedən çıxış edib. Hazırda rəsmi Parisin niyyəti geopolitik baxımdan normadan artıq iddialı görünmək və Cənubi Qafqazdakı proseslərə müdaxilə etməkdir. Daha doğrusu, Fransa bölgədə Rusiyanı əvəzləməyə çalışır. Fransanın Azərbaycandakı səfiri Zakari Qrosun son məqaləsi də bunu açıq-aşkar büruzə verir. Səfir öz məqaləsində yazıb ki, Fransa Prezidenti E.Makronun proseslərdə aktiv iştirakı Praqada uğurlu nəticə əldə etmək üçün həlledici əhəmiyyətə malik olub. "Yaşasın Praqa ruhu!” yazan səfir Makronun danışıqlarda iştirakını və əldə olunmuş nəticələri az qala Fransanın “xüsusi xidməti” kimi təqdim etməyə çalışıb. Halbuki, Makronun son çıxışlarında Praqa yox, “Ermənistan ruhu” daha çox hiss olunur. Ekspertlərin fikrincə, Fransa həqiqətən regionda sülh istəyirsə, prosesə qarışmamaqla bu işə öz töhfəsini vermiş olar.
Politoloq Məhəmməd Əsədullazadə "Şərq"ə bildirib ki, Fransa səfirinin məlum sözləri Ermənistana "ayı xidməti"dir. Analitik vurğulayıb ki, Fransa heç vaxt ədalətli mövqe sərgiləməyib:
"Praqa görüşlərində də rəsmi Paris birmənalı Ermənistanın maraqları çərçivəsində iştirak edib. Fransa neytral ölkə deyil və açıq-aşkar tərəf tutan bir dövlətin vasitəçiliyindən söhbət gedə bilməz. Makron Cənubi Qafqazda Ermənistanı dəstəkləməklə, ilk növbədə erməni lobbisinin maraqlarını müdafiə edir. Ermənistan vasitəsi ilə regionda öz geo-siyasi ambisiyalarını gücləndirməyə çalışır.
Məsələ ondadır ki, Fransa Cənubi Qafqaz regionuna Türkiyə ilə rəqabət fonunda baxır. Məqsədlərdən biri məhz İrəvanın əliylə Türkiyəni bölgədən xaric etməyə, ən azından mövqeyini zəiflətməyə cəhd göstərir.
Şübhəsiz, bu istək baş tutmayacaq. Fransanın bölgəmizdə gücü və təsir imkanları o zaman olardı ki, rəsmi Paris həqiqətən də Azərbaycan-Ermənistan arasındakı sülhə öz mühüm töhfəsini vermiş olardı.
Ancaq Fransanın belə bir qayəsinin olmadığını bilirik. Əslində erməni lobbisinin diktəsi ilə aparılan bu siyasət Ermənistanın özünün əleyhinədir. İrəvan sülh müqaviləsindən yayındığı müddətcə iqtisadi blokadadan yaxa qurtara bilməyəcək".
