Suriya, ölkəyə qarşı sonuncu əsas sanksiyaların qaldırılması üçün ABŞ ilə aparılan danışıqların bir hissəsi olaraq, Rusiya neftinin idxalını əhəmiyyətli dərəcədə azaltmağa razılıq verib.
Teleqraf xəbər verir ki, bu barədə "Reuters" agentliyi məlumat yayıb.
Məlumatlara görə, son aylarda Suriya hakimiyyəti müzakirələr zamanı Rusiya neftinin alışını azaltmağa hazır olduqlarını açıq şəkildə bildirib.
Eyni zamanda, ABŞ-nin bu sanksiyaların ləğvi üçün rəsmi olaraq Rusiya neft idxalının azaldılmasını məcburi şərt kimi irəli sürmədiyini vurğulayıblar.
ABŞ nümayəndələri Suriya tərəfinə bildiriblər ki, Rusiya neftinin alışının dayandırılması Suriyanın siyahıdan tez və rahat şəkildə çıxarılma şansını "artıracaq".
Dəməşq cavab olaraq qeyd etdi ki, sanksiyaların qaldırılması ölkəyə enerji təchizatını şaxələndirməyə imkan verəcək. Hazırda Suriya alternativ mənbələrin olmaması səbəbindən Rusiya neftindən əhəmiyyətli dərəcədə asılı olaraq qalır.
"Reuters"in hesablamalarına görə, bu il Rusiyanın Suriyaya neft tədarükü təxminən 75% artaraq gündə təxminən 60.000 barelə çatıb və bu da Rusiyanı ölkənin ən böyük xammal təchizatçısına çevirib.
Suriyanın enerji sektorundakı mənbə agentliyə bildirib ki, Dəməşq artıq yeni neft tədarükçüləri axtarır və idxal strukturunda "köklü dəyişikliklər" gözləyir.
ABŞ Dövlət Departamenti açıqlayıb ki, Vaşinqton Suriyanı ölkənin yenidənqurma prosesində "etibarlı korporativ tərəfdaşlar", əsasən Amerika şirkətləri ilə əməkdaşlığa çağırır və həmçinin Suriyanın Rusiyaya qarşı ABŞ sanksiyalarını davam etdirəcəyini gözləyir.
Ağ Ev öz növbəsində bildirib ki, Suriyanın terrorizmin dövlət sponsorları siyahısından çıxarılması ilə Rusiya neft idxalının azalması arasında rəsmi əlaqə yoxdur.
