Rusiya və ABŞ iki ölkə arasında mövcud gərginliyi azaltmaq məqsədilə ikitərəfli məsləhətləşmələrin Moskva və Vaşinqtonda davam etdirilməsi barədə ilkin razılıq əldə edib.
Bu barədə Rusiyanın ABŞ-dəki səfiri Aleksandr Darçiyev məlumat verib.
“Qeyd etmək lazımdır ki, müəyyən irəliləyiş var. Bu irəliləyişin real nəticəsi var, aprelin 10-da İstanbulda keçirilən son görüş zamanı tərəflər məsləhətləşmələrin paytaxtlarda keçirilməsi ilə bağlı ilkin qərar qəbul ediblər”, – o bildirib.
Səfirin sözlərinə görə, bu addım tərəflər arasında dialoqun bərpası və qarşılıqlı etimadın formalaşdırılması üçün yeni imkanlar yarada bilər.
Politoloq Əhəd Məmmədli Sherg.az-a bildirib ki, Rusiya və ABŞ rəsmiləri Moskva-Vaşinqton danışıqlarında üçüncü vasitəçiyə ehtiyac duymur:
"Bu təklif isə əsasən ruslardan gəlib. Türkiyə-Rusiya münasibətləri hazırda yüksək səviyyədə sayılsa da, Kreml danışıqlarda Ankaranın vasitəçiliyinin önə çıxmasını istəmir. İstanbuldakı Rusiya-Ukrayna müzakirələrindən sonra Rəcəb Tayyib Ərdoğan nəticələrin uğurlu olduğunu bildirdi. Rusiya mediası isə danışıqların heç də müsbət keçmədiyini, yalnız Türkiyə Prezidentinin öz istəkləri üçün bu cür söylədiyini yayımladı. Görünür ki, Kreml Ankaranın vasitəçiliyinə qısqanclıqla yanaşır. Bu, tarixin ironiyasıdır. Daim slavyan dünyası Osmanlını, türk xalqını Avropa ilə qarşıdurmaya sövq edib. İndi isə slavyan dünyasının 2 böyük dövləti Rusiya və Ukrayna müharibə aparır".
