Son illər beynəlxalq siyasətdə baş verən hadisələr ABŞ-nin geosiyasi mövqeyinə təsirsiz ötüşməyib. Qlobal güc statusunu qorumağa çalışan Vaşinqton, müxtəlif regionlarda yaranan münaqişələrə birbaşa və ya dolayı yollarla müdaxilə etməyə məcbur qalır. Müharibələrin bitməsi və sabitliyin təmin olunması ABŞ üçün yalnız humanitar və diplomatik məsələ deyil, eyni zamanda iqtisadi və strateji maraqlar baxımından da vacib hədəfdir. Lakin bu məqsədə çatmaq nə qədər arzuolunan olsa da, prosesin mürəkkəbliyi və çoxşaxəli maraqlar onu çətin və bəzən ziddiyyətli istiqamətə yönəldir.
Bu kontekstdə ABŞ prezidenti Donald Trampın "ABŞ Avropanın problemi olaraq qalmalı olan Ukrayna münaqişəsinə qarışmamalı idi" deməsi siyasi proseslərdə Vaşinqtonun ehtiyatla davranmaq istədiyini göstərir.
Mövzu ilə bağlı siyasi şərhçi Kənan Novruzov Sherg.az-a açıqlama verib:
"ABŞ prezidenti Donald Tramp hələ hakimiyyətə gəlməzdən əvvəl müharibəni bitirəcəyinə söz verdi. Rəsmi Vaşinqton indi də bunun üçün çalışır. Müharibənin bitməsi Ağ Evin maraqlarına uyğundur. Çünki ABŞ bir tərəfdən Rusiya ilə münasibətləri normallaşdırmaq istəyir, digər tərəfdən isə döyüşlər bitəndən sonra Ukraynaya investisiya qoymaq üçün tələsir. Üçüncü bir məqam isə odur ki, Şərqi Avropada müharibə bitəndən sonra Tramp administrasiyası bütün diqqətini Yaxın Şərqə yönləndirməyi hədəfləyir. Amma Trampın "ev tapşırığı" onun düşündüyü qədər asan olmadı. Vaşinqton ciddi böhranla üz-üzədir".
Ekspert Rusiya- Ukrayna müharibəsinə görə ABŞ-nin Avropa ilə üzə-üzə qaldığını və iki tərəf arasında gərginliyin getdikcə artıdığını bildirib:
"Avropa ilə ABŞ-nin üz-üzə qalması perspektivdə NATO-nun parçalanmasına səbəb ola bilər. Belə bir vaxtda Tramp bütün məsuliyyəti keçmiş hakimiyyətin boynuna atır. Amma Bayden hakimiyyəti istəsə də, istəməsə də savaşın bir hissəsinə çevrilməli idi. Çünki müharibəyə Bayden administrasiyası özü rəvac verib. Krım məsələsinin gündəmə gətirilməsi, NATO-ya üzvlük vədi, Ukraynanın silahlandırılması da əslində savaşda iştirak idi".
Müsahibimiz sonda ABŞ-nin Trampın iddialarına rəğmən, proseslərdən kənarda qalmayacağını, Ağ Ev rəhbərinin blef etdiyini qeyd edib.
