Tatarıstanın Elabuqa rayonunda zavoda PUA hücumu olunub.
Bu barədə Rusiya mətbuatı məlumat yayıb.
Məlumata görə, hücum edilən zavodda “Şahid” PUA-ları yığılırmış.
Bildirilib ki, zavoda zərbə Ukraynanın “Ukrjet” kompleksinin istehsalı olan “UJ-22 Airborne” PUA-sı ilə endirilib.
Bundan başqa, Tatarıstanın Nijnekamsk rayonundakı TANEKO zavodu da PUA-larla vurulub.
Tatarıstan rəhbəri Rüstəm Minnixanovun mətbuat xidmətindən verilən məlumata görə, hücum zamanı 6 nəfər yaralanıb.
Məsələ ilə bağlı “Sherg.az”a danışan “Beynəlxalq Münasibətlər və Diplomatiya Araşdırmaları” Mərkəzinin sədri, politoloq Samir Hümbətov söyləyib ki, bu cür hücumların baş vermə səbəbi qarşı tərəfinin əhalisində xof yaratmaqdan ibarətdir:
“Düzdür, Rusiyanın əlində imkanlar daha genişdir. Rəsmi Moskva Ukraynanın şəhərlərini uzaqmənzilli raketlərlə də vura bilir. Ukraynada isə bu məsələ fərqlidir. Yəni, Ukraynanın imkanları Rusiya qədər geniş deyil. Amma rəsmi Kiyev əlində olan PUA-dan istifadə etməklə Rusiyanın strateji və hərbi obyektlərinə zərbələr endirə bilir. İndiki məqamda Rusiyaya qarşı belə addımın atılma səbəblərindən biri məhz cəmiyyət daxilində qorxu yaratmaqdır. Ya Rusiya bundan qorxub geri addım ata bilər, ya da daha aqressiv şəkildə Ukrayna ərazilərini bombalaya bilər. Rusiyanın isə hələki geri çəkilmək niyyəti yoxdur”.
Qeyd edək ki, Tatarıstanın Elabuqa rayonuna PUA hücumu nəticəsində yaralananların sayı 12-yə çatıb.
