Yunanıstan ələ keçirilən Rusiya xam neft tankerini azad edəcək.
"Sherg.az" "CNN"ə istinadən xəbər verir ki, bunu yunan hökumət sözçüsü bildirib. Yunanıstan aprelin 15-də göyərtəsində 19 rusiyalı ekipaj üzvü olan tankeri həbs edib. Bu, Avropa Birliyinin Rusiyaya qoyduğu sanksiyalar nəticəsində gerçəkləşib.
Yunanıstanın Dənizçilik və Ada Siyasəti Nazirliyinin sözçüsü vurğulayıb ki, "Çirkli pulların yuyulması ilə mübarizə" orqanı gəminin buraxılması barədə göstəriş verib.
Sözçü əlavə edib ki, buraxılışa hələ başlanılmayıb.
Qeyd edək ki, Afina Xəbər Agentliyinin məlumatına görə, tanker mühərrikində yaranan problem səbəbindən Peloponnes yarımadasına doğru hərəkət edib. Orada yükünü başqa bir gəmiyə boşaltmağı planlaşdırıb.
Lakin əlverişsiz hava şəraiti ilə əlaqədar olaraq Yunanıstanın Evia adasının cənub sahili yaxınlığında lövbər salıb. Tanker burada ələ keçirilib.
