Ukrayna Prezidenti Volodimir Zelenski bildirib ki, Ukrayna Rusiya Prezidenti Vladimir Putinin elan etdiyi Pasxa atəşkəsinə əməl etməyə hazırdır.
“Ukrayna atəşkəs rejiminə riayət edəcək və yalnız güzgü prinsipi ilə hərəkət edəcək. Pasxa sükut və təhlükəsizlik zamanı olmalıdır”, - deyə Zelenski Telegram kanalında yazıb.
O əlavə edib ki, Ukrayna Silahlı Qüvvələrinin baş komandanı Aleksandr Sırski ilə atəşkəs dövründə qoşunların fəaliyyət qaydalarını müzakirə edib.
“Baş komandanla Ukrayna bölmələrinin atəşin dayandırılması şəraitində fəaliyyət qaydalarını müzakirə etdik. Hərəkətlərimizin güzgü xarakter daşıdığı və atəşkəsin Pasxadan sonra da uzadıla biləcəyi barədə məlumat Rusiya tərəfinə çatdırılıb”, – deyə Zelenski dəqiqləşdirib.
Rusiya Prezidenti Vladimir Putin Pasxa atəşkəsini 11 aprel saat 16:00-dan 12 aprel gününün sonuna qədər elan edib. Rusiya qoşunlarına bütün istiqamətlərdə döyüş əməliyyatlarını dayandırmaq, eyni zamanda qarşı tərəfin mümkün hücumlarının qarşısını almağa hazır olmaq tapşırılıb.
2025-ci ildə də Rusiya xüsusi hərbi əməliyyat zonasındakı ərazilərdə Pasxa atəşkəsi elan etmişdi və həmin atəşkəs üç gün davam etmişdi.
