Dünyada yalnız iki ədəd qalan şimal ağ kərgədanları, süni mayalanma üsulu ilə yaşadılmağa çalışılır. Sıx təhlükəsizlik tədbirləri ilə qorunan bu heyvanlar 24 saat silahlı mühafizəçilər tərəfindən izlənilir.
Sherg.az xəbər verir ki, Mərkəzi Afrikadakı təbii yaşayış yerlərində illərlə davam edən qanunsuz ovçuluq və vətəndaş müharibələri bu alt növü məhv olmaq həddinə gətirib çıxarıb.
"National Geographic" kanalında avqustun 24-də yayımlanan “The Last Rhinos: A New Hope” (Son Kərgədanlar: Yeni bir Ümid) adlı sənədli film, şimal ağ kərgədanlarını xilas etmə səylərindən bəhs edir.
Film 2018-ci ildə sağlamlıq problemlərinə görə 45 yaşında iynə vurularaq həyatına son qoyulan erkək kərgədan Sudanın son anları ilə başlayır. Onun ölümündən sonra yalnız 36 yaşlı dişi Najin və 25 yaşlı qızı Fatu qalıb.
Elmdə bir ilk: Süni mayalanma ilə kərgədan
Xilasetmə səyləri, ölmüş erkək kərgədanlardan toplanmış sperma ilə Fatudan götürülən yumurtaların süni mayalanma üsulu ilə döllənməsinə əsaslanır. Najin isə artıq yumurta verə bilmir.
Bu il alimlər Fatudan üç dəfə yumurta götürərək ümumilikdə 38 şimal ağ kərgədan embrionu yaradıb. Lakin nə Najin, nə də Fatu sağlamlıq səbəblərinə görə hamilə qala bilmir. Buna görə də embrionlar yaxın qohum növ olan cənub ağ kərgədanlarına yerləşdirilir.
Təhlükə altındakı növlər
Hazırda dünyada beş kərgədan növü mövcuddur. Cənub ağ kərgədanlarının sayı təxminən 17 mindir və Beynəlxalq Təbiəti Mühafizə İttifaqı tərəfindən “təhlükəyə yaxın” kateqoriyasında qiymətləndirilir.
İndoneziyada yaşayan Cava kərgədanlarının sayı cəmi 50-yə yaxındır. İki buynuzlu, tüklü Sumatra kərgədanı da eyni taleyi bölüşür – təbiətdə onların 50-dən az qaldığı ehtimal edilir.
