Bu gün-27 sentyabr Azərbaycanın Vətən müharibəsinə başlamasından 1 il ötür. Müzəffər Ali Baş Komandan İlham Əliyevin 2 dekabr 2020-ci il tarixli Sərəncamına əsasən 27 sentyabr ölkəmizdə Anım Günü kimi qeyd olunur. Çünki Ermənistanın Azərbaycana qarşı 2020-ci il sentyabrın 27-dən başlayan növbəti hərbi təcavüzünə cavab olaraq, Azərbaycan xalqı işğal altındakı torpaqların azad edilməsi məqsədilə Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə Vətən müharibəsinə başlayıb. Haqq və şərəf işimiz olan, Azərbaycan Respublikasının suverenliyi və ərazi bütövlüyü uğrunda gedən mübarizədə qəhrəmanlıq göstərən əsgər və zabitlərimiz, arxa cəbhədə çalışan mülki insanlarımız, bütövlükdə xalqımız əzm və iradə, yumruq kimi birləşib həmrəylik nümayiş etdirərək, düşmənə sarsıdıcı zərbələr endirib.
44 gün davam edən Vətən savaşında şəhidlik zirvəsinə ucalan, itkin düşən və yaralanaraq sağlamlığını itirən həmvətənlərimiz var. Torpaqlarımız qəhrəman şəhidlərimizin, əsgər və zabitlərimizin, qazilərimizin qanı və canı bahasına işğaldan azad edilib. Bu mənada 27 sentyabr Azərbaycan xalqının həyatında çox böyük tarixi önəm daşıyır. Məhz ona görə də sentyabrın 27-də Anım Günü ilə əlaqədar bütün dövlət təşkilatlarında, eləcə də özəl strukturlarda bir sıra tədbirlərin keçirilməsi nəzərdə tutulur, eyni zamanda süjetlər hazırlanır. Məsələn, Medianın İnkişafı Agentliyi də bu şərəfli və müqəddəs gün münasibətilə müzəffər Ali Baş Komandanın rəhbərliyi ilə 44 gün ərzində döyüş meydanında, arxa cəbhədə, diplomatiya müstəvisində və informasiya məkanında Azərbaycanın şanlı qələbəsini təmin etmək üçün canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq təsirli video-çarx ərmağan edib.
"Sherg.az" videonu təqdim edir:
