Azərbaycana böyük valyuta qazandıra bilər
Azərbaycan-Türkiyə Turizm üzrə Birgə Komissiyasının 2-ci iclasında ikitərəfli turizm əlaqələrinin mövcud vəziyyəti, turizm idarəetməsi, tənzimlənməsi, təşviqi, təhsili və təlimi, marketinq, kommunikasiya və turizm məhsulları, növbəti dövr üçün birgə Fəaliyyət Proqramının hazırlanması və digər məsələlər müzakirə olunub.
Komissiya iclası Dövlət Turizm Agentliyinin sədrinin müavini Azadə Hüseynova və Türkiyə mədəniyyət və turizm nazirinin müavini Nadir Alpaslanın həmsədrliyi ilə keçirilib. İclasda çıxış edən Azadə Hüseynova ikitərəfli turizm əlaqələrinin cari vəziyyətindən söz açaraq, gəlmə və getmə turizmi sahəsində statistik göstəricilər və fəaliyyət planı üzrə görülmüş işlər barəsində məlumat verib.
O qeyd edib ki, cari ilin yanvar-noyabr ayları ərzində Azərbaycana 283 493 Türkiyə vətəndaşı səfər edib və bu rəqəm ötən ilin eyni dövrü ilə müqayisədə 60 faiz artım hesab olunur.
A.Hüseynova növbəti dövr üçün birgə Fəaliyyət Proqramının hazırlanmasının əhəmiyyətinə toxunaraq bu proqramda turizm üzrə ixtisaslaşmış assosiasiyalar arasında əməkdaşlıq imkanlarının genişləndirilməsinə yer verilməsinin iki ölkə arasında turizm əlaqələrinə öz töhfəsini verəcəyini bildirib.
Türkiyə mədəniyyət və turizm nazirinin müavini Nadir Alpaslan öz növbəsində iki ölkə arasında bütün sahələrdə uğurlu əməkdaşlıq münasibətlərinin formalaşdığını qeyd edərək, turizm sahəsində əlaqələrin inkişaf etdirilməsi üzrə böyük imkanların olduğunu vurğulayıb.
O, çıxışında bu istiqamətdə təcrübə mübadiləsinin, qarşılıqlı fəaliyyətin və birgə təbliğat işlərinin önəminə diqqət çəkib.
Müzakirələr zamanı qeyd olunub ki, Azərbaycan Turizm və Menecment Universiteti ilə Türkiyənin Sakarya Universiteti və Eskişehir Osmanqazi Universiteti arasında ikili diplom proqramının, həmçinin ixtisasartırma və turizm peşələri ilə bağlı təlim proqramlarının təşkil edilməsi turizm təhsili istiqamətində əməkdaşlığa müsbət təsirini göstərəcək.
İclas çərçivəsində keyfiyyətli turizmin təşkili ilə əlaqədar standartlaşdırma və sertifikasiya, turizm və istirahət komplekslərinin təşviqi məqsədilə əməkdaşlıq imkanlarının araşdırılması, turizm və rekreasiya zonalarının və infrastruktur layihələrin yaradılması istiqamətində təcrübə mübadiləsinin aparılması, işğaldan azad edilmiş ərazilərdə investisiya layihələri kimi mövzulara toxunulub.
Çıxışlarda həmçinin beynəlxalq platformalarda birgə təqdimatların keçirilməsi və ortaq turizm marşrutlarının yaradılması məsələlərindən bəhs olunub.
Turizm üzrə ekspert Elçin Əliyev Türkiyə ilə Azərbaycan arasında ortaq turizm marşrutlarının yaradılması istiqamətindəki danışıqları müsbət qiymətləndirib.
Türkiyənin böyük turizm bazarı olduğunu vurğulayan ekspert deyib ki, onsuz da Azərbaycandan Türkiyəyə çoxlu sayda turistlər gedir. Türkiyəli turistlərin ölkəmizə cəlb edilməsi baxımından bu cür layihələrin həyata keçirilməsini vacib hesab edir: “Türkiyədən nə qədər çox turist Azərbaycana gəlsə, ölkəmizin iqtisadiyyatına daha çox gəlir qazandırar. Qardaş ölkədən Azərbaycana daha çox turist gətirmək üçün onları Qalaaltı, Naftalan, Duzdağ kimi kurort mərkəzlərinə, yəni Türkiyədə olmayan məkanlara cəlb etməliyik”. Azərbaycanla Türkiyə arasında ortaq turizm əlaqələrini inkişaf etdirmək üçün münbit şərait olduğunu vurğulayan ekspertə görə, gəlmə turizmi turizm sektorunda çox önəmlidir. Bu turizm Azərbaycana çox böyük valyuta qazandıra bilər: "Həmçinin turizm inkişaf etdikcə, ölkədə yeni iş yerlərinin də sayı artacaq. Əgər qarşılıqlı layihələrdə bu amillər diqqətə alınarsa, bizim ölkənin də mənafeyinə daha çox uyğun olar. Bizim yeni mineral mənbələrimiz var. Bu baxımdan yeni kurort məkanları aşkar oluna, hotellər tikilə bilər. Bu həm ölkəyə turistlərin cəlbi, ölkənin tanıdılması, həm iqtisadiyyatın inkişafı, həm də əhalinin məşğulluğunun təmin olunmasıdır».
