Məşhur “Lego” şirkəti ABŞ-nin Kaliforniya ştatı polisinə ciddi xəbərdarlıq edib. “Sherg.az” “Milliyet.com.tr”yə istinadən xəbər verir ki, şirkət istehsal etdiyi oyuncaqların görüntüsünün şübhəlilərin üzlərinin örtülməsində istifadəsinə etiraz edib. “Lego” şirkətinin məhsulları dünyada ən çox tələbat olan və ən çox satılan oyuncaqlardır. Kaliforniya polisi isə şübhəli qismində saxlanılan şəxslər barədə məlumat verərkən, onların üzünü müxtəlif oyuncaqların görüntüsü ilə örtür. Polis bununla şübhəlilərin kimliyinin gizli saxlanması qanununa əməl etsə də, digər tərəfdən istehsalçı şirkətin hüquqlarını pozur. Şirkət belə hesab edir ki, hər hansı cinayətdə şübhəli bilinərək polis tərəfindən saxlanılan və barələrində istintaq araşdırması aparılan şəxslərin üzünün “Lego” oyuncaqlarının görüntüləri ilə örtülməsi, bu oyuncaqları sevən uşaqlara qarşı aqressiv bir hərəkətdir. Və uşaqlarda bu oyuncaqların “cinayətkar” obrazını formalaşdıra bilər. Qeyd edilir ki, şübhəli şəxslərin simasının oyuncaq görüntülərlə, emojilərlə örtülməsi, həmçinin belə hallarda bəlli smayliklərdən də istifadə edilməsi, son zamanlar dəb halını alıb. Bu isə istehsalçı və istehlakçı hüquqlarına ziddir. Odur ki, şirkət Kaliforniya polisinə müraciətlə “şübhəli şəxslərin simasına "Lego" başları əlavə etməkdən əl çəkin”, deyə xəbərdarlıq edib. Polis isə bu üsulu “xalqın əhvali-ruhiyyəsini yüksəltmək” məqsədilə etdiyini bildirib. Əlavə edib ki, xəbərdarlığı diqqətə alacaq və şübhəlilərin simasını örtmək üçün başqa üsuldan istifadə edəcəklər.
Kaliforniya polisinə xəbərdarlıq
“Şübhəliləri oyuncaqlara bənzətməyin”
