Qarşıda birgə görüləcək işlər və layihələr barədə müzakirələr aparılıb
Türkiyə Respublikasının Azərbaycandakı Səfirliyinin mətbuat müşaviri Alptəkin Cahangir İşbilir bu gün "Şərq" qəzetinin redaksiyasını ziyarət edib. Qəzetin baş redaktoru, tarix üzrə fəlsəfə doktoru Akif Aşırlı türkiyəli qonağı redaksiyanın iş şəraiti, redaksiya nəzdində fəaliyyət göstərən Mətbuat Tarixi Muzeyinin dəyərli eksponatları ilə tanış edib.
Müşavirlə baş redaktor arasında media sahəsində maraqlı müzakirələr olub. Azərbaycan-Türkiyə, o cümlədən türk dövlətlərinin media sahəsində fəaliyyətin daha da gücləndirilməsi yönündə görülə biləcək işlər haqda fikir mübadiləsi aparılıb.
A.Aşırlı Türkiyə səfirliyi və qardaş ölkənin media subyektləri ilə nəzərdə tutulan birgə layihələrdən bəhs edib. Alptekin Cihangir İşbilir də Türkiyə və Azərbaycan mediasının qarşılıqlı fəaliyyətinin yeni layihələrlə gücləndirilməsinə ehtiyacın duyulduğunu vurğulayıb.
Eyni zamanda Akif Aşırlının Qafqaz İslam Ordusu, Nuri Paşa və Azərbaycan mətbuat tarixi haqqında çox qiymətli araşdırmalarının, əsərlərinin olduğunu deyərək, bu istiqamətdə görülən işləri yüksək qiymətləndirib.
