İsrailin ən böyük qaz yatağı olan "Leviafan"ın işlənməsi hüquqlarına sahib olan konsorsium Misirlə 35 milyard dollarlıq qaz tədarükü üzrə müqavilə bağladığını elan edib.
Oxu.Az-ın xəbərinə görə, bu barədə STMEGI.com nəşri məlumat verib.
Məlumata görə, konsorsium müqavilə çərçivəsində növbəti 15 il ərzində Misirə 130 milyard kubmetr qaz tədarük edəcək ki, bu da yataqdakı ümumi qaz ehtiyatlarının 22%-ni təşkil edir.
Müqavilə Misirə 60 milyard kubmetr qaz tədarükü ilə bağlı 2019-cu il müqaviləsinə əlavədir.
Misir qazı "Blue Ocean Energy" şirkəti vasitəsilə alacaq. 20 milyard kubmetr qaz 2026-cı ilin birinci yarısından başlayaraq, qalan 110 milyard kubmetr isə hasilat gücü artırıldıqdan, Aşkelon və El-Ariş arasında qaz kəməri genişləndirildikdən sonra tədarük ediləcək.
