"Azərbaycanın yalnız regional deyil, həm də daha geniş coğrafiyada məsuliyyətli tərəfdaş kimi çıxış etdiyini göstərir”
Ukrayna Prezidenti Volodimir Zelenskinin Azərbaycana səfəri və Prezident İlham Əliyev ilə Qəbələdə keçirilən görüşlər iki ölkə arasındakı münasibətlərin gələcək inkişaf trayektoriyasını müəyyənləşdirmək baxımından tarixi əhəmiyyət daşıyır. Bu səfər sıradan diplomatik hadisə deyil. Xüsusilə, Rusiya-Ukrayna, ABŞ/İsrail-İran müharibəsinin davam etdiyi, Yaxın Şərqdə gərginliyin pik həddə çatdığı və qlobal nizamın yenidən formalaşdırılmağa başlandığı bir dövrdə Ukrayna Prezidentinin Azərbaycana səfəri, imzalanan sənədlər və verilən bəyanatlar həm geosiyasi gündəmdə, həm də ikitərəfli münasibətlərdə ciddi dəyişikliklərin baş verdiyini göstərir.
Bu dinamikanın əsas hərəkətverici qüvvəsi isə, şübhəsiz ki, Azərbaycandır. İki ölkə arasında münasibətlərin bu səviyyədə inkişafı və konkret nəticələrin əldə olunması Azərbaycanın ardıcıl siyasəti və Prezident İlham Əliyevin qətiyyətli siyasi iradəsi sayəsində mümkün olub.
Zelenskinin Azərbaycana səfəri iki ölkə arasında iqtisadi, enerji və humanitar sahədə əməkdaşlığın dərinləşməsi baxımından xüsusi əhəmiyyət daşıyır. Bu səfər eyni zamanda Azərbaycan və Ukrayna arasında hərbi və müdafiə sahəsində yeni əməkdaşlıq mərhələsinin başlanması kimi də dəyərləndirilir. 
Milli məclisin deputatı Jalə Əliyeva Sherg.az-a bildirib ki, Prezident İlham Əliyev və Volodimir Zelenski arasında keçirilən görüş və bu səfər çərçivəsində səsləndirilən bəyanat, müasir beynəlxalq münasibətlər sistemində Azərbaycanın artan diplomatik çəkisini və çoxşaxəli xarici siyasət kursunu bir daha nümayiş etdirir: “Azərbaycan Prezidentinin mətbuata verdiyi bəyanat ilk növbədə ölkənin balanslaşdırılmış və praqmatik xarici siyasət strategiyasını əks etdirirdi. Prezident İlham Əliyev çıxışında Azərbaycanın beynəlxalq hüquqa, dövlətlərin ərazi bütövlüyünə və suverenliyinə sadiqliyini vurğulayaraq, bu prinsiplərin həm regional, həm də qlobal səviyyədə sabitliyin əsasını təşkil etdiyini bildirdi. Bu yanaşma, xüsusilə Ukrayna ətrafında davam edən münaqişə fonunda xüsusi əhəmiyyət kəsb edir.
Bəyanatda diqqət çəkən əsas məqamlardan biri humanitar və iqtisadi əməkdaşlıq məsələləri oldu. Bu, Azərbaycanın yalnız regional deyil, həm də daha geniş coğrafiyada məsuliyyətli tərəfdaş kimi çıxış etdiyini göstərir”.
Millət vəkilinin sözlərinə görə, digər mühüm istiqamət enerji təhlükəsizliyi və nəqliyyat-logistika əməkdaşlığıdır:
“Prezident İlham Əliyev Azərbaycanın Avropanın enerji təminatında oynadığı rolu vurğulayaraq, alternativ enerji marşrutlarının şaxələndirilməsinin vacibliyini qeyd etdi. Bu kontekstdə Azərbaycan-Ukrayna əməkdaşlığı, xüsusilə tranzit və logistika sahəsində yeni imkanlar vəd edir. Azərbaycanın Xəzər regionundan Avropaya uzanan enerji və nəqliyyat dəhlizlərində rolu Ukrayna üçün də strateji əhəmiyyət daşıyır.
Siyasi baxımdan isə səfər iki ölkə arasında münasibətlərin yeni mərhələyə qədəm qoyduğunu göstərir. Volodimir Zelenski ilə aparılan danışıqlar qarşılıqlı etimadın və tərəfdaşlığın möhkəmləndirilməsi baxımından əhəmiyyətlidir. Bu münasibətlər həm ikitərəfli, həm də çoxtərəfli platformalarda əməkdaşlığın genişlənməsi üçün zəmin yaradır.
Bəyanatın ümumi ruhu onu deməyə əsas verir ki, Azərbaycan qlobal proseslərdə daha fəal iştirak edən, prinsipial mövqe sərgiləyən və eyni zamanda praqmatik maraqlarını qoruyan aktor kimi çıxış edir. Prezident İlham Əliyevin çıxışı yalnız diplomatik protokol çərçivəsində deyil, həm də strateji mesajlar baxımından əhəmiyyətli idi. Volodimir Zelenskinin Azərbaycana səfəri və bu çərçivədə verilən bəyanat, Bakı ilə Kiyev arasında əməkdaşlığın dərinləşməsi ilə yanaşı, Azərbaycanın beynəlxalq münasibətlər sistemində artan rolunun növbəti təsdiqi kimi qiymətləndirilə bilər. Bu səfər, həm də regionda və daha geniş geosiyasi məkanda yeni əməkdaşlıq konturlarının formalaşmasına təkan verən mühüm diplomatik hadisə kimi yadda qalır”.
