Dəniz insanları udur

Boğulmağın birinci səbəbi məsuliyyətsizlik, digəri isə yararsız çimərliklərdir

Çimərlik varsa, orda lazım olan bütün təhlükəsizlik tədbirləri görülüb ondan sonra insanların ixtiyarına buraxılmalıdırDənizdə boğularaq dünyasını dəyişən insanların sayı kəskin artıb. Demək olar hər gün bir neçə insanın acı xəbəri ilə qarşılaşırıq. İllərdir ki, mətbuat nümayəndələri bu məsələni işıqlandırır, ekspertlər maarifləndirmə aparır, amma yenə də dənizdə boğularaq dünyasını dəyişən insanların sayı azalmır. 

Məsələni şərh edən təhlükəsizlik eksperti Elmar Nurəliyev “Sherg.az”a bildirib ki, nə qədər maarifləndirmə aparılsa da, yenə insanlar öz həyatlarına biganə yanaşır:
“İnsanlar istirahət vaxtlarını xoş və mənalı keçirməyi fikirləşsələr də, ani bir məsuliyyətsizlik sonda bədbəxt hadisələrə gətirib çıxardır. Çimərlikdə boğulmaya birinci səbəb məhz insanların özləri, digəri isə qeyri-çimərlik ərazilərinin olması və burada heç bir təhlükəsizlik tədbirlərinin görülməməsidir. Birinci növbədə insanlar çimərliyə gedərkən hava şəraitini nəzərə almalıdır. Bütün boğulma hadisələrinin demək olar ki, çoxu havanın küləkli olduğu vaxtda baş verib.
Daha sonra insanlar hansı çimərliyi seçməsinə diqqət etməlidir. Natəmiz və nəzarətsiz olan çimərliklərə getməmək lazımdır. Bir məsələni də qeyd edim ki, insanlar hər zaman eyni çimərliyə üz tuturlar. Getdikləri yerdə suyun hansı səviyyədə dərinləşdiyini, suyun dibində daş-kəsəyin olub-olmamasını bilmirlər.
Qeyri-çimərlik ərazilərində hər an təhlükəli vəziyyət yarana bilər. Həmin çimərliklərin də nəzarətsiz olduğunu nəzərə aldıqda insanların bədbəxt hadisə ilə qarşılaşması heç də çətin olmur.
Ona görə də qeyri-çimərlik anlayışının ləvğ edilməsi lazımdır. Yəni çimərlik varsa, orda lazım olan bütün təhlükəsizlik tədbirləri görülüb ondan sonra insanların ixtiyarına buraxılmalıdır. Bununla bağlı bir neçə dövlət qurumu da müştərək işləyə bilər. Hazırda çimərliklərə Kiçikhəcmli Gəmilərə Nəzarət və Sularda Xilasetmə, Dövlət Xidmətinin əməkdaşları nəzarət edir. Demək olar ki, hər gün boğulma təhlükəsi ilə üzləşən onlarla insan xilas edilir. Onu da qeyd edim ki, boğulma hallarının heç biri bayaq sadaladığım qurumların nəzarət etdiyi ərazilərdə olmayıb. Demək, nəzarət olarsa, çimərlikdə boğulma halları baş verməz”.
E.Nurəliyev onu da söyləyib ki, çimərliklərə nəzarət edən qurumların əməkdaşlarına istirahət əsnasında qayda pozanlara inzibati cəza tədbirlərinin görülməsi ilə bağlı bir səlahiyyətin verilməsi daha məqsədəuyğun olardı:
“Çünki bəzən qayda pozanlar xilasedici nəzarətçilərin qanuni tələbinə məhəl qoymur, onlarla mübahisə edir.
Hətta nəzarətçilərə fiziki müqavimət göstərənlər də olur. Ona görə qayda pozanları məsuliyyətə cəlb etmə səlahiyyəti verilməsi yaxşı olardı. Ümumiyyətlə, insanlar çalışıb təhlükəsiz, nəzarət sistemi olan çimərliklərə üz tutmalıdır. Çimərlikdə alkoqol içkilər qəbul etmək olmaz. Bu, birbaşa insan həyatı üçün təhlükəlidir. Çünki spirtli içki qəbul edən şəxs həm günvurma hallarına daha tez məruz qalır, həm də suda boğulma riski artıq olur. Çimərlikdə qəbul ediləcək qidalara da diqqət etmək lazımdır. Yağlı, qızardılmış, konservləşdirilmiş qidaları çimərlikdə qəbul etməmək məsləhətdir”.