“Türkiyə ilə ABŞ arasında “buz” yoxdur”
Bu sözləri “Şərq Tv”-nin “Düzünü deyək” verilişinin növbəti efirində iyunun 14-də ABŞ prezidenti Co Baydenlə türkiyəli həmkarı Rəcəb Tayyib Ərdoğan arasında keçiriləcək görüş barədə danışan Azərbaycan Demokrat Partiyasının (ADP) sədri Sərdar Cəlaloğlu deyib.
“Bəzən hətta dost dövlətlər arasında da anlaşılmazlıq olur. ABŞ-ın strateji maraqları olan yerlərdə Türkiyənin özünə təsir dairəsi yaratması narahatlıqla qarşılanır. Hərçənd Türkiyə ABŞ-ın, NATO-nun strateji tərəfdaşıdırsa belə olmalı deyil. Əksinə, Vaşiqton Ankaranın güclənməsinə dəstək olmalıdır. Məsələ ondan ibarətdir ki, Qərb hələ də Osmanlını unuda bilmir. Orada elə bilirlər ki, Ərdoğanın siyasəti həmin imperiyanı dirçəltməyə hesablanıb”.
S. Cəlaloğlu həmçinin əlavə etdi ki, ABŞ reallıqla barışmalıdır:
“Fikrimcə, görüş zamanı Ərdoğan Baydenə Türkiyə xarici siyasətinin mahiyyətini açıq formada izah edəcək. Onun özünün də dediyi kimi, Türkiyə məzlumun, beynəlxalq hüququn yanındadır. ABŞ bunu başa düşüb, qəbul edərsə, lap yaxşı. Əks halda gərginlik davam edəcək. Və bundan daha çox əziyyət çəkən Bayden özü olacaq. ABŞ anlamalıdır ki, vaxtı ilə Osmanlının təsir dairəsində olan yerlərdə, o cümlədən Yaxın Şərqdə, Orta Asiyada, Cənubi Qafqazda və Balkanlarda Türkiyənin iradəsi nəzərə alınmadan siyasət aparıla bilməz. ABŞ həmin ərazilərdə maraqlarının təmin olunmasını istəyirsə, Türkiyə ilə hesablaşmalıdır”.
