“Çalışırlar ki, Azərbaycan Ermənistanın içərilərinə daxil olsun”
“Rusiya prosesə qarışsın və nəticədə Rusiya-Türkiyə toqquşması baş versin”
Mayın 27-dən 28-nə keçən gecə ərzində Naxçıvan Muxtar Respublikasının Babək rayonunun Aşağı Buzqov yaşayış məntəqəsi yaxınlığında yerləşən mövqelərimiz Ermənistan silahlı qüvvələrinin bir neçə istiqamətdə açdığı atəşə məruz qalıb.
Bu barədə Müdafiə Nazirliyi məlumat yayıb.
Nəticədə hərbi qulluqçu əsgər Muradov Elxan İlham oğlu çiynindən yaralanıb. Yaralı əsgərimizə dərhal ilkin tibbi yardım göstərilərək hospitala təxliyə edilib. Hərbi qulluqçumuzun həyatı üçün heç bir təhlükə yoxdur.
Müdafiə Nazirliyinin rəhbərliyi yaralı əsgərin tezliklə şəfa tapmasını diləyir.
Əlahiddə Ümumqoşun Ordunun bölmələrinin cavab atəşi ilə qarşı tərəf susdurulub. Əməliyyat şəraiti Azərbaycan ordusunun tam nəzarəti altındadır.
“Bildiririk ki, Ermənistan-Azərbaycan dövlət sərhədinin Naxçıvan sahəsində vəziyyətin nisbi gərginləşdirilməsinə görə məsuliyyət tam şəkildə Ermənistanın üzərinə düşür. Ermənistan tərəfini təxribatlar törətməkdən, vəziyyətin gərginləşməsinə səbəb olacaq digər addımlardan çəkinməyə və məsuliyyətli davranmağa çağırırıq”, - deyə Müdafiə Nazirliyi bəyan edib.
Vəziyyəti dəyərləndirən MCP sədrinin müavini, politoloq Məhəmməd Əsədullazadə “Sherg.az”a deyib ki, Ermənistan dövlət sərhədinin delimitasiyasından yayınır və baş nazir səlahiyyətlərini yerinə yetirən Nikol Paşinyan seçki öncəsi sərhəddə təxribatlara hazırlaşır:
“Prezident Armen Sarkisyan orduya əmr verib və Nikol Paşinyan heç bir dəhlizin olmayacağını vurğulayıb. Ermənistanın bu provakasiyalari və təxribatları sərhəddə hərbi toqquşmaya səbəb ola bilər. Ola bilər, Paşinyan çalışır ki, hərbi toqquşma baş versin və seçkini ləğv etsin. Çünki onun bu vəziyyətdə seçilməsi artıq polemikadı”.
M.Əsədullazadə, həmçinin düşmənin niyyətini izah etdi:
“ABŞ öz vətəndaşlarına və Azərbaycana səfər etməməyi çağırış etməsi belə bir hərbi toqquşmanın olacağından qaynaqlanır. İki ölkə sərhəddində vəziyyətin gərgin olmasını Rusiya dövlət başçısı Putinin zəngi də təsdiq edir. Ermənistan hakimiyyəti hərbi təxribatda maraqlıdır. Çalışır ki, Azərbaycan Ermənistanın içərilərinə daxil olsun. Rusiya prosesə qarışsın və nəticədə Rusiya-Türkiyə toqquşması baş versin. Fransa da bu böhranın qızışmasında fəal rol oynayır”.
