“Polad Həşimovun döyüş yoldaşı, polkovnik İlqar Mirzəyevin də xatirəsinə belə bir büst hazırlayacam”
Son günlər sosial şəbəkələrdə paylaşılan əsas fotolardan biri Tovuz döyüşlərində qəhrəmancasına şəhid olan general-mayor Polad Həşimovun büstüdür. İnsanlar fəxrlə bu büstün görüntüsünü yayır, ali rütbəli zabitimiz haqqında “Allah rəhmət eləsin!” deyirlər.
Həmin büstün müəllifi isə Azərbaycan Dövlət Rəssamlıq Universitetinin IV kurs tələbəsi Təbriz Soltanlıdır. İstedadlı gənc bu təşəbbüsü barədə “Sherg.az”ın suallarını cavablandırıb:
- Necə oldu ki, şəhidimizin büstünü hazırlamağı qərara aldınız?
-Əlbəttə, cənab generalın qəhrəmancasına həlak olması hər kəs kimi məni də duyğulandırdı. Onun əsgərlərlə birlikdə döyüşməsi böyük şücaətdir. Hər birimiz əlimizdən gəldiyi qədər Polad bəyin xatirəsini yad etməli idik. Mənim də əlimdən gələn bu idi. Generalın büstünü hazırlamaq öz ideyamdır. Kimdənsə məsləhət almamışam.
-Bu, ilk işiniz idi?
-Xeyr. Milli qəhrəmanımız Mübariz İbrahimovun da büstünü hazırlamışdım. 2012-ci ildə kollecdə oxuduğum illərdə diplom işim olub. Bacardığım qədər qəhrəmanlarımızın, şəhidlərimizin heykəllərini, büstlərini düzəldirəm.
-Polad Həşimovun büstünü hazırlamağa nə qədər vaxt sərf etdiniz?
-Dörd günə işi tamamilə bitirdim. Əvvəl eskizi, sonra isə büstü hazırladım. Əgər hardansa istəsələr, büstü məmnuniyyətlə, özü də təmannasız verərəm.
-Reaksiyalar necə oldu?
-Çox yaxşı. Tanıyan, tanımayan hər kəs razılığını bildirdi, “əliniz, qolunuz var olsun” dedilər. Sözsüz ki, büstü hazırlamağım aldığım təriflərə görə deyildi. Bu, mənim vətəndaşlıq borcum idi.
-Gələcək planlarınız nələrdir?
-General-mayorun döyüş yoldaşı, polkovnik İlqar Mirzəyevin də xatirəsinə belə bir büst hazırlayacam. İkisinin də ruhu şad olsun!
