“Koronavirus digər qriplərdən öz əlamətlərinə görə çox da fərqlənmir. Eyni temperaturu verir və eyni narahatlığa səbəb olur. Ona görə də biz bu xəstəliyi ilk gəlişində digər qriplərdən ayırd edə bilmirik”.
Bunu Sherg.az-a açıqlamasında tanınmış həkim-psixoterapevt Əli Nağıyev deyib.
Bəs “belə halda nə etməliyik?” sualına isə həkim bu cür cavab verib:
“İlk növbədə hər bir qrip halında poliklinikalara getməliyik. Koronavirusla bağlı spesifik profilaktika, vaksinasiya hələ ortada olmadığı üçün xəstəlikdən qorunmaq üçün qeyri-spesifik profilaktika növündən istifadə edilməlidir. Yəni immuniteti gücləndirən vasitələrindən yararlanmalıyıq. Çoxlu maye qəbul etməli, sarımsaq və soğandan daha çox istifadə etməliyik. Tibbi profilaktika növlərindən biri də fiziki aktivlikdir. İdmandan vaz keçilməməlidir. Açıq havada daha çox gəzmək lazımdır. İş mühitində öskürən, asqıran, burnu axan varsa, o adamlardan uzaq durmalıyıq. Xəstələrdən tibbi maskalardan istifadə etmək, işə çıxmamaq tələb olunmalıdır”.
Əli Nağıyev: “Ağır hallara düşməmək üçün xəstəliyin ilk günlərində həkim nəzarəti vacibdir”
Ə.Nağıyev vurğulayıb ki, ən vacib məsələ isə qorxmamaqdır:
“Televiziyalarda çıxışlarım zamanı hər dəfə bu məqama diqqət çəkirəm. Qorxu bizi daha çox öldürür, nəinki xəstəliyin özü. Təşviş halı immunitetimizi zəiflədir. Təşvişə o mənada əsas yoxdur ki, il ərzində qripdən ölənlərin sayı 200 nəfər olsa da, avtomobil qəzasında həyatını itirənlərin sayı bundan dəfələrlə çoxdur. Vaxtı ilə “Hepatit C” virusundan qorxanlara da deyirdim ki, alkoqolun məhv etdiyi insanların sayı bu virusun öldürdüyü insanların sayından 10 dəfə artıqdır. Qorxu o vaxt olar ki, səndə xəstəlik əlamətləri müşahidə olunsun. Əslində o halda da qorxmaq yox, gecikmədən evə təcili tibbi yardım çağırmaq lazımdır. Ağır hallara düşməmək üçün xəstəliyin ilk günlərində həkim nəzarəti vacibdir. Fərdi səviyyədə edə biləcəyimiz bunlardır. Dövlət və səhiyyə sistemi öz işini görür”.
“Qrip elə qripdir. Sadəcə koronavirusa qarşı spesifik immunitet hələ formalaşmayıb
Həkim onu da əlavə edib ki, adi qripdən ölənlərin faiz nisbəti heç də koronavirusdan ölənlərdən ciddi fərqlənmir:
“Qrip elə qripdir. Sadəcə koronavirusa qarşı spesifik immunitet hələ formalaşmayıb. Xəstəliyə yoluxmalısan ki, ona qarşı immunitet formalaşsın. Amma digər qriplərə artıq öyrəşmişik. Ona görə də onlardan çox qorxmuruq”.
