"Qazaxın 4 kəndinin Azərbaycana qaytarılması ilə bağlı qanuni proseduru Paşinyanın əleyhinə istifadə etməyə çalışırlar"
Azərbaycan ilkin mərhələdə Ermənistanda 300 min azərbaycanlını (tarixi yurdlarından zorla qovulmuş – red.) məskunlaşdırmağı planlaşdırır.
Bu fikirləri Ermənistanın keçmiş ombudsmanı Arman Tatoyan çıxış edib.
A.Tatoyan bildirib ki, Ermənistanın yeni təhlükəsizlik strategiyasına ehtiyac var:
“Rəsmi Bakının bəyanatlarına görə, birinci mərhələdə Ermənistanda 300 min azərbaycanlının məskunlaşması planlaşdırılır. Həmin azərbaycanlıların beynəlxalq missiyanın himayəsi altında və təhlükəsizlik təminatı şəraitində məskunlaşdırılmaları nəzərdə tutulur. Hazırkı vəziyyət təcili olaraq yeni təhlükəsizlik strategiyasının qəbulunu tələb edir”.
Mövzu ilə bağlı “Sherg.az”a danışan politoloq Natiq Miri bildirib ki, Tavuş istiqamətində Azərbaycanın 4 kəndinin qaytarılması ilə bağlı razılıq və bu yöndə görülən işlər Ermənistanda müxalifəti hərəkətə gətirib:
“Bu istiqamətdə Rusiyanın “5-ci kalonu”, revanşist qüvvələr, Qarabağ klanı və Ermənistan Apostol kilsəsi vəziyyətdən istifadə edərək Ermənistan cəmiyyətini ayağa qaldırmaqla Nikol Paşinyan hakimiyyətini süpürüb atmaq niyyətindədirlər. Çünki torpaqların qayıtması bütün cəmiyyət üçün həssas məqamdır. Ona görə də müxaliflər, bu gün müxtəlif dezinformasiyalar, ideologiyalar irəli sürürlər. Hətta xalqı kilsənin ətrafında birləşərək dini dövlət yaratmağa çağırışlar edirlər. Tatoyanın dedikləri hakimiyyət əleyhinə olan şəxsin açıqlamasından başqa bir şey deyil. Qazaxın 4 kəndinin Azərbaycana qaytarılması ilə bağlı qanuni proseduru Paşinyanın əleyhinə istifadə etməyə çalışırlar. Onlar düşünürlər ki, bu, revanşist qüvvələrin əlində olan yeganə şansdır. Yəni Rusiyanın vasitəsilə hökümət əleyhinə olan bütün revanşist qüvvələr hərəkətə keçib. Çünki bundan sonra proseslərin inkişafı yaxın prespektivdə sülh müqaviləsinin imzalanmasıyla nəticələnə bilər”.
Ekspert qeyd edib ki, hazırda sülh müqaviləsinin bütün prinsipləri razılaşdırılmışkən, hələ də sülh sazişisini imzalamaq mümkün olmayıb:
“Belə olan halda 300 min azərbaycanlının tarixi torpaqlarına qaytarılması necə mümkündür? Sadəcə olaraq müxalif qüvvəllər Paşinyanı devirməklə yenidən hakimiyyətə gəlmək istəyirlər. Bununla da illərlə Ermənistanı istismar obyektinə çevirmək məqsədi güdürlər. Bir tərəfdən Rusiyanın yalanlar institutu dezinformasiyalarla erməni xalqını ayağa qaldırmağa çalışırsa, digər tərəfdən Ermənistanda mövcud olan bütün siyasi müxalif güc mərkəzləri Nikol Paşinyanı devirməyin yollarını axtarırlar”.
